SQO-da medıtsına qyzmetkerine qol kótergen er adam 1,5 jylǵa sottaldy
PETROPAVL. KAZINFORM — Soltústik Qazaqstan oblysy Shal aqyn aýdanynyń turǵyny oqıǵa ornyna kelip, alǵashqy medıtsınalyq kómek kórsetpek bolǵan medbıkeni uryp tastaǵan.
Qyzmettik mindetin atqaryp júrgen medıtsına qyzmetkerine kúsh qoldaný faktisi boıynsha qylmystyq isti Shal aqyn aýdanaralyq soty qarady.
Sottyń málimetinshe, oqıǵa bıyl 23 maýsym kúni saǵat 12:00 shamasynda Shal aqyn aýdanynyń Uzynjar aýyly mańynda bolǵan. Mas kúıde bolǵan N. esimdi sottalýshy qyzmettik mindetin oryndap júrgen medıtsına qyzmetkeri A.-ǵa qasaqana kúsh kórsetken. Ol medıtsına qyzmetkeriniń aıaq-qolyna jáne ish tusyna soqqy jasap, tepken. Osylaısha jábirlenýshiniń kásibı mindetin oryndaýyna kedergi keltirilgen.
Quqyq buzýshyny oqıǵa ornyna kelgen polıtsııa qyzmetkerleri toqtatyp, aıyryp alǵan.
Sot barysynda aıyptalýshynyń kinási qylmystyq is materıaldarymen, jınalǵan dáleldemelermen jáne óziniń kinásin tolyq moıyndaǵan jaýabymen dáleldendi.
— Sot úkimimen N. Qazaqstan Respýblıkasy Qylmystyq kodeksiniń 380-3-babynyń 3-bóligi «Qyzmettik mindetterin atqarý ústindegi medıtsına qyzmetkerine qatysty zorlyq-zombylyq jasaý» boıynsha kináli dep tanyldy. Sot úkimimen ol endi 1 jyl 6 aıyn qylmystyq-atqarý júıesiniń qaýipsizdigi barynsha tómen mekemesinde ótkizedi. Úkim zańdy kúshine engen joq, — delingen habarlamada.
Esterińizge salaıyq, medıtsına qyzmetkerlerin soqqyǵa jyqqandarǵa jaza kúsheıtildi.
