SQO-da medıtsınalyq poıyzda 15-20 jyl dárigerge kórinbegen turǵyndar qaraldy
«Salamatty Qazaqstan» medıtsınalyq poıyzy SQO-da toqtaǵan sońǵy stantsııa – Dáýit eldi mekeni. Qazaqstannyń shalǵaı aýyldarynyń turǵyndaryn qamtýdy maqsat etken «dóńgelekti emhanada» elimizdiń jeke klınıkalarynda eńbek etetin joǵary bilikti dárigerlerge kórinýge bolady. Poıyzda barlyq qajetti jabdyqtar, sondaı-aq óziniń zerthanasy bar, barlyǵy 7 vagon bolsa, sonyń tórteýinde dárigerler jumys isteıdi. Terapevt, akýsher-gınekolog, pedıatr, kardıolog, nevropatolog, okýlıst, LOR, gınekolog, hırýrg, ýrolog, mammolog, stomatolog sııaqty mamandar qabyldaý júrgizedi.
Dáýit stantsııasynyń turǵyndary bul múmkindikti paıdalanyp qaldy.
«Tańerteń analızderdi tapsyrdym, terapevt, ÝDZ mamany, okýlıste boldym. Dárigerler densaýlyǵymda kinárat joq dedi. Medıtsınalyq poıyzdy bizdikindeı shalǵaı eldi mekenderge jibergenine kóp rahmet. Bul ýaqyt pen aqshany únemdeıdi. Sondyqtan jobany uıymdastyrýshylarǵa jáne poıyzdyń barlyq medıtsınalyq qyzmetkerlerine shyn júrekten alǵys aıtamyn», - deıdi jergilikti turǵyn Ázimbaı Myrqasov.
SQO-da medıtsınalyq poıyzǵa 6 stantsııanyń turǵyndary tekserildi. Alǵashqy medıtsınalyq jáne konsýltatıvtik kómekti 3 108 adam aldy, olardyń 402 - si bala. Jalpy, dárigerge 17 337 turǵyn qaralǵan.
Dárigerlerdiń aıtýynsha, SQO turǵyndarynda kóbinese uıqy beziniń iriń kernegen isigi, perıapıkaldy tinderdiń aýrýlary, búırek jáne nesep tastary, sozylmaly obstrýktıvti pıelonefrıt, tuzdy dıatez aýrýlary anyqtalady. Al mamandardyń ishinde hırýrgke, lorǵa, oftalmologqa jáne stomatologqa suranys joǵary.
Medıtsına mamandary tekserý barysynda sırek kezdesetin aýrýlardy da anyqtaǵan. Máselen stantsııalardyń birinde jas qyzǵa ehınokokk dıagnozy qoıyldy.
«Ehınokokk – taspa qurttyń bir túri, baýyrǵa, ókpege jáne súıekterge áser etetin lıchınkalar kısta sııaqty bolady. Naýqasta eshqandaı belgiler bolǵan joq. Ol jaı ǵana tekserýden ótti, ýltradybystyq zertteý kezinde biz onkologııaǵa kúdiktendik, KT-ǵa joldama berdik, ol eshteńe anyqtamady. Osydan keıin olar ony MRT-ǵa jiberdi, ol ehınokokty kórsetti. Sondaı - aq, ol jergilikti emhanada esepke turyp, Oblystyq aýrýhanada ota jasaý úshin portalda tirkeldi», - deıdi «Salamatty Qazaqstan» medıtsınalyq poıyzynyń jetekshisi Aman Qasenov.
Akýsher-gınekolog Gúlmıra Berdáli 2 aıdan astam ýaqyt boıy medıtsınalyq poıyzda qabyldaý júrgizip keledi.
«Ókinishke oraı, aýyldarda turatyn áıelder jumysbastylyqpen ári shalǵaı bolǵandyqtan gınekologqa sırek barady. Maǵan 15-20 jyl dárigerge qaralmaǵan áıelder keldi, al gınekologııalyq tekserý jylyna keminde bir ret júrgizilýi kerek. Biz olardy tekseremiz, aýrýlardy anyqtaımyz, keıbirine ózimiz em jasasaq, endi birin oblystyq klınıkalarǵa qosymsha keńeske jiberdik», - deıdi dáriger.
«Medıtsınalyq poıyzdar» jobasy alǵash ret 2010 jyly iske qosyldy. Pandemııaǵa baılanysty úzilis jasaýǵa májbúr boldy. Jalpy, 10 maýsymda jolǵa shyqqan «Densaýlyq», «Járdem» jáne «Salamatty Qazaqstan» konsýltatıvtik-dıagnostıkalyq úsh poıyzy Qazaqstannyń 1700-den astam shalǵaı óńirin aralap, 489 myńǵa jýyq turǵyndy tekserdi.
Joba «Samruk-Kazyna Trust» áleýmettik jobalardy damytý Qorynyń qarjylyq qoldaýynyń jáne QR Densaýlyq saqtaý mınıstrliginiń qatysýymen «Samuryq-Qazyna» AQ kompanııalar tobynyń atynan «Qazaqstan Temir Joly» UK AQ janyndaǵy «áleýmettik jobalar qory» Korporatıvtik qorymen yntymaqtastyqtyń arqasynda múmkin boldy.
«Salamatty Qazaqstan» poıyzy SQO-dan shyǵyp, kórshi Qostanaı oblysyna barady, onda 9 stantsııanyń turǵyndaryn qabyldamaq.
