SQO-da medıtsınalyq maskalar nelikten jetispeı jatqandyǵy túsindirildi
PETROPAVL. QazAqparat – Petropavlda medıtsınalyq maska qat taýarǵa aınaldy, dep habarlaıdy QazAqparat tilshisi.
Petropavl turǵyndary áleýmettik jelilerde medıtsınalyq maskalardyń kóptegen dárihanalardan joǵalǵanyn aıtyp, shaǵymdanýda. Ony tabý úshin búginde qalany sharlaý qajet. Alaıda mundaı maskany tanymal habarlandyrý saıttarynan esh qıyndyqsyz tabýǵa bolady. Baǵasy – 80-100 teńge shamasynda.
«Densaýlyq saqtaý basqarmasy bólshek saýdaǵa áser ete almaıdy. Olar jeke kásipkerler. Zaýyttarmen nemese ónimdi jetkizýshilermen tikeleı jumys isteıdi. Qazirgi ýaqytta maska tapshy ekeni ras. Kúndelikti ákelingenimen ony birden talap alady. Deldaldar keri áserin tıgizip jatyr. Qoldan kelgenshe áreket etip jatyrmyz. Maska jasaıtyn zaýyttarǵa tapsyrys berdik. Óńirge qajetinshe jetkiziledi», - dedi SQO Densaýlyq saqtaý basqarmasynyń jetekshisi Tımýr Sultanǵazıev.
Tımýr Sultanǵazıevtiń pikirinshe, halyqtyń kópshiligi bul maskalardy ne úshin jáne qaı ýaqytta kııý qajettigin bilmeıdi.
«Dúnıejúzilik densaýlyq saqtaý uıymynyń medıtsınalyq maskany paıdalaný boıynsha usynysy bar. Birinshiden, maskany kııý arqyly tumaýdyń aldyn alýǵa jáne koronavırýspen kúresýge bolatyndyǵy dáleldenbegen. Ekinshiden, aýyrmasańyz maska kııý mindetti emes. Alaıda sizde juqpaly respıratorlyq aýrýlardyń belgileri bolsa, túshkirseńiz, jótelseńiz, aınaladaǵylardy aýyrtpaý úshin maska kıgenińiz durys. Basqa jaǵdaıda maska kııýge keńes bermeımin. Aýrýdan saqtanǵyńyz kelse terezeni jıi ashyp, jeldetip otyryńyz, ylǵaldy tazalyqty jıi júrgizińiz. Qoldy sabynmen jýyp, quramynda spırti bar suıyqtyqtarmen súrtińiz. Al aýrýdyń alǵashqy belgileri baıqalǵan jaǵdaıda birden jedel járdem qyzmetin shaqyryńyz», - deıdi Tımýr Sultanǵazıev.
Densaýlyq saqtaý basqarmasynyń málimetinshe, óńirdegi emdeý mekemelerinde dári-dármek jetkilikti. Preparattardy alýǵa oblysqa qosymsha 7,5 mln teńge bólinse, emdeýge qajetti kerek-jaraq, sonyń ishinde medıtsınalyq maskalar da tolyǵymen alyndy.
