SQO-da medıtsınalyq qyzmetkerler tapshy
ASTANA. QazAqparat - Soltústik Qazaqstan oblysynda 250 medıtsınalyq qyzmetkerdiń jetispeýshiligi baıqalyp otyr, dep habarlaıdy QazAqparat.
Bul týraly búgin Ortalyq kommýnıkatsııalar qyzmetinde ótken baspasóz máslıhatynda SQO ákimi Qumar Aqsaqalov málim etti.
«Kadrlar boıynsha problemanyń bar ekenin jasyrmaımyn. Oblysqa shamamen 250 medıtsınalyq qyzmetker jetispeıdi, onyń 160-y oblys ortalyǵyna kerek. Sol sebepti, bizdiń mamandar medıtsınalyq bilim berý mekemelerin, ýnıversıtetterdi aralap shyqty. Sońǵy derekterge sáıkes, 80-ge jýyq kelisim bekitildi», - dedi Qumar Aqsaqalov.
Sonymen birge, ákim Soltústik Qazaqstanǵa kelýdi uıǵarǵan mamandarǵa belgili bir jeńildikter qarastyrylǵanyn eske saldy.
«Qalaǵa keletin maman 450 myń teńge kóleminde kóshý qunyn alady. Oǵan qosa, bıýdjetten tys qarajat esebinen mamannyń baspanany jaldaý aqysyn tólep bere alamyz. Sondaı-aq, baspana kezegine turǵyzyp, balalaryn balabaqshaǵa ornalastyrýǵa kómektesemiz», - dep óz sózin túıindedi oblys ákimi.
Q.Aqsaqalovtyń málimdeýinshe, 2017 jyldyń alǵashqy 7 aıynda Soltústik Qazaqstan oblysynda týberkýlezben aýyrý kórsetkishiniń 7,1%-ǵa (233-ten 214 oqıǵaǵa deıin), onkologııalyq aýrýlardyń - 10,3%-ǵa (1130-dan 1003 oqıǵaǵa deıin), onkologııalyq aýrýlardan bolǵan ólim-jitim deńgeıiniń - 13,5%-ǵa (434-ten 371 oqıǵaǵa deıin) tómendegeni baıqalǵan.
