SQO-da medıtsınalyq qyzmet kórsetýde 51 myńnan astam kemshilik anyqtalǵan
«Áleýmettik medıtsınalyq saqtandyrý qory» KEAQ SQO fılıaly baspasóz qyzmetiniń málimetinshe, 2021 jyldyń 6 aıynda qordyń SQO boıynsha fılıaly sarapshylary 114 tekserý júrgizgen. Nátıjesinde 51 myńnan astam kemshilik anyqtaldy.
«Bul kemshilikter syrqattyń densaýlyǵyna keri áser etken joq. Desek te, eń kóp kezdesetin kemshilik konsýltatsııalyq-dıagnostıkalyq qyzmetter kórsetý kezinde jasalady. Bul - 88,9 %-yn alady. Onyń ishinde eń kóp úles kómek-qyzmet kólemin negizsiz arttyrýǵa qatysty – 83,72%, emdeý-dıagnostıkalyq is-sharalardy júrgizýde standarttardan, densaýlyq saqtaý salasyndaǵy erejelerden, klınıkalyq hattamalardan negizsiz aýytqý – 9,7 %-dy, medıtsınalyq qujattamany durys resimdemeý - 5,2 %-dy alady», - deıdi «Áleýmettik medıtsınalyq saqtandyrý qory» KEAQ SQO fılıaly dırektory Larısa Gordeeva.
Sarapshylar onkologııalyq kómek kórsetetin jeti densaýlyq saqtaý nysanyn: onkologııalyq ortalyqty, tórt qalalyq emhanany jáne eki aýdandyq aýrýhanany tekserdi. Tekserý kezinde kómektiń úsh deńgeıde - ambýlatorııalyq, statsıonarlyq, statsıonardy almastyratyn jaǵdaılarda, sondaı-aq úıde dıagnostıka men emdeýdiń klınıkalyq hattamalaryna sáıkes kórsetilýi negizge alyndy.
«Onkologııalyq kómek - isikterdiń aldyn alýǵa, olardy erte anyqtaýǵa, onkologııalyq patsıentterdiń densaýlyǵyn saqtaýǵa jáne qalpyna keltirýge baǵyttalǵan medıtsınalyq qyzmetter kesheni. Onkologııalyq kómek medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý júıesi aıasynda tegin kórsetiledi. Keshendi is-sharalar júrgizilýi tıis. Sarapshylar medıtsınalyq uıymdardy tekserý kezinde osy is-sharalardyń tolyqtyǵy men oryndalý merzimderiniń saqtalýyn baǵalady», - deıdi Larısa Gordeeva.
Mamannyń aıtýynsha, qaterli isikpen kúreste eń bastysy - aldyn alý, dıspanserleý, ıaǵnı syrqattar medıtsına qyzmetkerlerimen birge óz densaýlyǵy úshin jaýapty jáne dárigerdiń barlyq taǵaıyndaýlaryn múltiksiz oryndaýy tıis.
«Onkologııalyq kómek kórsetýde máseleler bar. ıAǵnı, syrqattar der kezinde emdeý mekemesine jatqyzylmaıdy, profılaktıkalyq tekserý joq, qaterli isikke kúdik bolǵanda jáne ol dıagnozy rastalǵan kezde syrqat tolyq tekserýden ótkizilmeıdi. Konsýltatıvti-dıagonostıkalyq qyzmet uzaq kórsetiledi. Kompıýterlik tomografııa, magnıtti-rezonansty tomografııa sııaqty qosymsha zertteý ádisterin uzaq kútý qajet jáne aýdandyq medıtsınalyq uıymdar onkolog dárigerlermen tolyq qamtylmaǵan», - deıdi fılıal basshysy.
Barlyq anyqtalǵan máseleler sheshim qabyldaý úshin SQO densaýlyq saqtaý basqarmasyna jáne medıtsınalyq uıymdardyń basshylaryna jetkizildi.
