SQO-da medıtsına fakýlteti ashylady
PETROPAVL. QazAqparat - SQO memlekettik ýnıversıtetiniń aldaǵy damý josparlary týraly JOO rektory Serik Ómirbaev aıtyp berdi, dep habarlaıdy «QazAqparat» HAA tilshisi.
Onyń aıtýynsha, búgingi tańda elde qolǵa alynǵan jańa bastamalardyń 40 paıyzy jastar máselesine baǵyttalǵan.
«Eń aldymen jańa mamandyqtar ashylady. Qazir bar 48 mamandyqtyń ústine tehnıkalyq jáne aýyl sharýashylyǵy salasymen baılanysty 23 mamandyq ashylady»,-dedi S.Ómirbaev.
Oblys ákiminiń tapsyrmasymen ýnıversıtette agrotehnıkalyq jáne medıtsınalyq fakýltetter óz jumysyn bastamaq. Rektordyń aıtýynsha, abıtýrıentter bıyldan bastap qabyldana bastaıdy.
«Ýnıversıtet klınıkalyq keshen usyný maqsatynda jergilikti densaýlyq basqarmasyna usynys jiberdi. Onsyz medıtsınalyq fakýltet ashý múmkin emes. Basqa qujattardyń bári daıyn tur. Klınıkalyq keshenge qol jetkizsek, lıtsenzııalaý jumystary bastalady. Qalada ǵylym kandıdaty, PHD doktory ǵylymı ataqtary 11 adam bar. Olardy ýnıversıtetke tartsaq bıyldan bastap ınternatýra ashý múmkindigimiz bar. Eki jyldyń ishinde ózimizdiń jergilikti medıtsınalyq mamandardy daıyndap shyǵara alamyz», - deıdi rektor.
S.Ómirbaev SQO oqýshylaryna bólinetin granttyń da ulǵaıyp kele jatqanyn tilge tıek etti.
«Bizdiń JOO-nyń 2022 jylǵa qaraı ulǵaıa túsetinin esepke alatyn bolsaq, jataqhanadaǵy oryndar qajettiligi 3,8-ge jetedi. Qazir bizde 1,1 myń orynǵa shaqtalǵan úsh jataqhanamyz bar. Qazirdiń ózinde 1,3 myń orynnyń jetispeýshiligi baıqalady. Kem degende eki jataqhana salýymyz kerek. Jobalyq-smetalyq qujattar daıyn tur, qurylys quny 4,4 mlrd teńge»,-deıdi S.Ómirbaev.
