SQO-da medbıke eki balanyń ólimine qatysty sottaldy
PETROPAVL. KAZINFORM - Soltústik Qazaqstan oblysynda kásibı mindetin tıisti deńgeıde atqarmaǵan medıtsına qyzmetkeri sot zalynda qamaýǵa alyndy.
Qylmystyq isti SQO mamandandyrylǵan aýdanaralyq qylmystyq soty qarady. Sot úkimi QR Qylmystyq kodeksiniń 317-baby 4-bóligi (medıtsına nemese farmatsevtıka qyzmetkeriniń kásiptik mindetterin tıisinshe oryndamaýynan abaısyzda eki nemese odan da kóp adamnyń ólimine ákelýi) boıynsha shyǵaryldy.
SQO sotynyń málimetinshe, byltyr maýsym aıynda Qyzyljar aýdany Nadejka aýylyndaǵy feldsherlik-akýsherlik pýnktke K. esimdi turǵyn óziniń otbasy músheleriniń ýlanýyna baılanysty medıtsınalyq kómek surap júgingen. Tergeý materıaldaryna sáıkes, ýchaskelik medbıke B. óz kásibı mindetterin tıisti deńgeıde oryndamaǵan. Ol jedel túrde alǵashqy medıtsınalyq kómekti kórsetpegen, ýlanǵan adamdardy aýrýhanaǵa jatqyzý sharalaryn qabyldamaǵan, jaǵdaıdyń aýyrlyǵyn eskere otyryp, jappaı ýlaný deregi jóninde quzyrly organdarǵa jáne aýdandyq aýrýhana basshylyǵyna der kezinde habarlamaǵan.
Saldarynan nıtrıtterden qatty ýlanǵan eki bala — úsh jáne alty jastaǵy búldirshinder kóz jumdy. Sot barysynda B.-nyń kinási jábirlenýshiniń, kýágerlerdiń kórsetýimen, sot-medıtsınalyq saraptama qorytyndylarymen tolyq dáleldendi.
Memlekettik aıyptaýshy men jábirlenýshi tarap B.-ny kináli dep tanyp, ony 5 jylǵa bas bostandyǵynan aıyrý jazasyn taǵaıyndaýdy surady. Al aıyptalýshy men onyń qorǵaýshysy kináni moıyndamaı, aqtaýdy ótindi.
Jazany taǵaıyndaý kezinde sot aıyptalýshynyń jastyǵyn jáne oń minezdemesin eskerdi.
Sot úkimimen B. eki jylǵa bas bostandyǵynan aıyryldy. Sonymen qatar, ol úsh jylǵa deıingi merzimde medıtsına salasynda qyzmet atqarý quqyǵynan aıyryldy.
Sot úkimi zańdy kúshine engen joq.
Esterińizge salaıyq, oqıǵa byltyr 13 maýsym kúni bolǵan edi. Qyzyljar aýdany Nadejka eldi mekeninde Kovalenkonyń otbasy jergilikti dúkennen keshki asqa tushpara men shujyq alyp jeıdi. Biraq kóp uzamaı birinen soń biri aýyryp, jergilikti medqyzmetkerdi kómekke shaqyrǵan. Úsh jasar ul men 6 jasar qyz balany qutqarý múmkin bolmady.