SQO-da maıly daqyldar jınaý aıaqtaldy
PETROPAVL. QazAqparat – Soltústik Qazaqstan oblysynda bıyl egin oraǵy jyldaǵydan erte aıaqtalyp, dıqandar jazdaǵy qýańshylyq pen karantınge qaramastan jaqsy ónim aldy, dep habarlaıdy QazAqparat tilshisi.
Búgin SQO ákimdiginiń otyrysy ótip, kúzgi oraq naýqany qorytyndylandy. Bıyl dıqandar mańyzdy ári jaýapty jumysty tájirıbe men iskerliktiń arqasynda oıdaǵydaı, ári merziminen erte aıaqtady. Máselen byltyr sharýalar bıdaı oraǵyn tek 29 qazan bitirse, bıyl naýqandy 3 qazanda aıaqtady. Maıly daqyldardy ádettegideı qarasha aıyna deıin sozbaı qazan aıynyń sońynda qambaǵa quıdy.
«Agrotehnıkalyq is-sharalardy tolyq qoldanýǵa jáne merziminde aıaqtaýǵa memlekettik qoldaý sep boldy. Bıyl aýyl sharýashylyǵyn damytýǵa 48,6 mlrd teńge jumsaldy. Bul ótken jylǵydan 23% artyq. Bul qarajattyń jartysy ósimdik sharýashylyǵyna jumsaldy. Nátıjesinde karantın men qurǵaqshylyqqa qaramastan jaqsy ónim alyndy», - dedi SQO ákimi Qumar Aqsaqalov.
Bıyl alqaptan ár gektardan ortasha 15 tsentnerden, barlyǵy 4,5 mln tonna bıdaı jáne ár gektardan 8,5 tsentnerden - 785,8 myń tonna maıly daqyl jınaldy. Mamandardyń aıtýynsha, bıdaıdyń sapasy óte jaqsy, ónimniń 67% 1-3 klassty bıdaı quraıdy.
«Memlekettik qoldaýdy tek alqappen durys jumys isteıtin kásipkerler ǵana alady. Sýbsıdııa olardy yntalandyrý úshin beriledi. Alaıda agrarshylar óz mindettemelerin de umytpaýlary qajet. ıAǵnı jumysshylarynyń eńbekaqylaryn ósirýleri kerek. 9 aıdyń qorytyndysy boıynsha onyń 17% artqanyn kóremiz. Kásipkerler aýyl turǵyndarynyń paılaryn berip qana qoımaı, atqarylǵan jumysqa esep berýleri tıis», - dedi óńir basshysy.
Qumar Aqsaqalov aýdan basshylaryna da birqatar tapsyrma júktedi. Eldi mekenderde tabys tehnıkany jańartyp, jańa kásiporyndardyń ashylýyna, sonyń ishinde jumys oryndaryn qurýǵa baǵyttalýy kerek.
Búginde naryqta bıdaıdyń tonnasy ortasha 86 myń teńge turady, bul byltyrǵydan 23% artyq. Arpa 47,5 myń teńgeden 54 myń teńgege deıin qymbattasa, zyǵyrdyń tonnasy 119 myń teńgeden 184 myń teńgege deıin jetip otyr.
