SQO-da maıly daqyldar alqaby 1 mln ga jetti

PETROPAVL. KAZINFORM — Soltústik Qazaqstan oblysynda bıyl dándi daqyldar alqaby 100 myń ga azaıyp, onyń ornyna maıly daqyldar egilmek. 

SQO aýyl sharýashylyǵy jáne jer qatynastary basqarmasynyń basshysy Dáýren Toqýjınovtyń aıtýynsha, aýyl sharýashylyǵyn ártaraptandyrýǵa baılanysty bıyl 2,9 mln ga dándi daqyldar egiledi. Al maıly daqyldar 1 mln ga sebilmekshi. Sonymen qatar, júgeri alqabyn 15 myń ga arttyrý josparlanǵan. Al kartop pen kókónister alqabynyń aýmaǵy burynǵy deńgeıde saqtalady. Jalpy, bıyl da byltyrǵydaı 4,3 mln ga alqapqa dán egilmek.

Kóktemgi egis naýqanyna daıyndyq jumystary ýaqytyly júrgizilgen. Erte qarjylandyrý arqasynda sharýalar ótken jyldyń qazan aıynan bastap jańa maýsymǵa qamdanýǵa múmkindik aldy. «Keń Dala-1» jáne «Keń Dala-2» baǵdarlamalary aıasynda jalpy mólsheri 86 mlrd teńge bólindi. Onyń 38 mlrd «Soltústik» áleýmettik-kásipkerlik korporatsııasy arqyly, al 32,5 mlrd teńgesi Agrarlyq nesıe korporatsııasy arqyly berilgen. Budan bólek, «QazAgroQarjy» AQ arqyly aýyl sharýashylyǵy tehnıkalaryn jańartýǵa 5% jeńildetilgen mólsherlememen 35 mlrd teńgeden astam qarjy baǵyttaldy. Al Azyq-túlik kelisimshart korporatsııasy arqyly forvardtyq satyp alýǵa 8,8 mlrd teńge qarastyrylǵan.

Sonymen qatar, óńirde 455 myń tonna tuqym daıyndalyp, olardyń barlyǵy saraptamadan ótti.

— Bıyl alǵash ret pılottyq joba retinde qyzyl jasymyqty satyp alýǵa 171 mln teńge bólindi. Osy maqsatta Azyq túlik-kelisimshart korporatsııasy úsh sharýashylyqty qarjylandyrdy.

Tehnıka naýqanǵa daıyn. Memleket tarapynan arzandatylǵan dızel otyny bólindi. Naýryz aıynda 16 myń tonna, al sáýirde 30 myń tonna janar-jaǵarmaı jetkizý josparlanǵan. Sharýalar úshin dızel otynynyń baǵasy lıtrine 281 teńge bolyp bekitilgen, bul naryqtaǵy baǵadan aıtarlyqtaı tómen, kommertsııalyq baǵa — 315 teńgeden joǵary, — deıdi Dáýren Toqýjınov.

Sonymen qatar, ónimdilikti arttyrý maqsatynda SQO-ǵa shamamen 300 myń tonna mıneraldy tyńaıtqysh jetkizýge kelisimshart jasalǵan. Jyl basynan beri otandyq zaýyttardyń arnaıy shottaryna 10 mlrd teńge aýdaryldy.

— Sharýalar tyńaıtqyshtar úshin naryq baǵasynyń 40% ǵana tóleıdi, al qalǵan 60% memleket sýbsıdııalaıdy. Bul, qazirgideı tyńaıtqysh quny 300 myń teńgeden asqan jaǵdaıda agrarıılerlerge úlken jeńildik, — deıdi basqarma basshysy.

Buǵan deıin 3 myńǵa jýyq fermer kóktemgi egis jumystaryna qarjy alǵanyn jazǵan edik.