SQO-da mas júrgizýshi sebepshi bolǵan jol apatynan reseılik áıel qaza tapty
PETROPAVL. QazAqparat – Soltústik Qazaqstan oblysynda mas júrgizýshi joldyń qarsy baǵytyna shyǵyp ketip, Reseıden kelgen áıeldiń ólimine sebepker boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jol-kólik apaty 19 shilde kúni respýblıkalyq mańyzdaǵy «Chelıabi-Novosibir» avtojolynyń 645 shaqyrymynda bolǵan.
M.Jumabaev aýdanynyń Qaraqoǵa aýyly mańynda reseılik otbasy mingen «Toyota Corolla» avtokóligin osy aýdannyń «Toyota Land Cruiser» avtokóligin mingen 35 jaastaǵy turǵyny soqqan.
Er adam rýlge mas kúıde otyrǵan, bir mezet joldyń qarsy baǵytyna shyǵyp ketip, kep qalǵan kólikpen betpe-bet soqtyǵysqan.
«Toyota Corolla»-nyń jolaýshysy Reseı azamatshasy oqıǵa ornynda qaıtys boldy, onyń 7 jasar uly aýrýhanaǵa jatqyzyldy.
«Toyota Land Cruiser» júrgizýshisi ýaqytsha qamaýda ustaý ızolıatoryna qamaldy. Atalǵan fakti QR Qylmystyq kodeksiniń 345-1 baby boıynsha tirkeldi. «Toyota Land Cruiser» júrgizýshisine qatysty úıqamaqqa alý túrindegi bultartpaý sharasy tańdaldy. Er adam 7 jylǵa bas bostandyǵynan aıyrylýy múmkin.
«Kólikti mas kúıde basqarý, ásirese, joǵary jyldamdyqpen júri qaıǵyly jaǵdaılarǵa aparyp soǵýy múmkin. Respýblıkalyq joldardaǵy qozǵalys kezinde júrgizýshiler barynsha saq bolýy tıis. Jol-kólik oqıǵalary kóp jaǵdaıda alys jolǵa shyqqan júrgizýshiniń sharshaýynan, basyp ozý, burylý, jyldamdyqty asyrý sııaqty manevrlerdi jasaǵan kezde bolatynyn eske salamyz», - deıdi SQO PD Jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.
Bıylǵy jarty jyldyń ishinde oblys joldarynda mas júrgizýshilerdiń kesirinen 9 jol-kólik oqıǵasy tirkeldi, saldarynan 3 adam qaza taýyp, 9-y jaraqat aldy.
Jalpy jyl basynan SQO-da 127 jol-kólik oqıǵasy tirkeldi, saldarynan 19 adam qaza taýyp, 191-i jaraqattandy.
Apattardyń 24-i respýblıkalyq mańyzdaǵy avtojoldarda bolǵan, onda 8 adam qaıtys bolyp, 49 adam jaraqat alǵan.
