SQO-da mas júrgizýshi kóligimen kólge túsip ketti
PETROPAVL. QazAqparat – Soltústik Qazaqstan oblysynda kólikke mas kúıde otyrǵan júrgizýshi rólge ıe bola almaı kólge túsip ketti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa keshe 8 maýsym kúni Mamlıýtka qalasy mańyndaǵy kólde bolǵan. Mamlıýt aýdandyq polıtsııa bólimi kezekshisiniń kómekshisi Azamat Dáýitov kezekshi bólimge jalǵanǵan beınekameralardan tóńirekti sholyp otyr qalaǵa kire beriste «Nissan Almera Classic» markaly kóliktiń jol shetine shyǵyp ketip, kólge baryp aýdarylǵanyn kóredi. Birden áriptesterine habarlap, olar tez arada oqıǵa ornyna attanady. Saqshylar jetkenge deıin júrgizýshi aýdarylǵan kólikten ózdiginen shyqqan.
Keıin júrgizýshiniń mas jáne rólge ıe bola almaı qalyp, aýdarylǵany belgili boldy.
«Medıtsınalyq kýálandyrýdyń nátıjesine sáıkes 44 jastaǵy er adamnyń spırttik ishimdik ishkeni rastaldy. Kólikti mas kúıde basqarǵany úshin oǵan qatysty ákimshilik materıal jınaldy. Sot sheshimimen kólik júrgizýshisine 15 táýlikke ákimshilik qamaýǵa alý túrindegi jaza taǵaıyndaldy jáne 7 jylǵa júrgizýshi kýáliginen aıyryldy», - dedi Mamlıýt aýdany Polıtsııa bóliminiń bastyǵy Serik Áljanov.
