SQO-da mas kúıinde jol apatyn jasaǵan júrgizýshi oqıǵa ornynan izin sýytqan
SQO polıtsııa departamenti baspasóz qyzmetiniń málimetinshe, Maǵjan Jumabaev aýdanynda turatyn 60 jastaǵy júrgizýshi «Lada Kalina» markaly kóligimen jolǵa shyqqan. Er adam «Chelıabi-Novosibir» tas jolynyń 585 shaqyrymynda «Nissan Primera»-ny basyp ozý kezinde osy kóliktiń artqy kórinis aınasyn qaǵyp ketken. Bul jóninde zaqymdanǵan kólik ıesi birden «102» nómirine habarlaǵan.
SQO PD patrýldik polıtsııa batalonynyń qyzmetkerleri shaqyrýǵa shyǵyp, oqıǵa ornynan ketip qalǵan júrgizýshiniń kóligin kúrtik qardan tapty. Er adam mas bolǵan, ol kólikti basqara almaı joldan shyǵyp ketken. Júrgizýshi zardap shekken joq, al kóligine mehanıkalyq zaqym keldi.
Mas kúıde kólik basqarǵany úshin quqyq buzýshyǵa qatysty QR Ákimshilik quqyq buzýshylyq týraly kodeksiniń 608-baby 3-bóligi boıynsha materıal jınastyryldy. Sot úkimimen ol 7 jylǵa kólik basqarý quqyǵynan aıyrylyp, 20 táýlikke ákimshilikke qamaýǵa alyndy.
«Mas kúıde kólik basqarý – jol-kólik oqıǵasyna alyp kelýi múmkin. Osyndaı faktilerdi anyqtaý jáne jolyn kesý úshin 14 naýryzdan oblys aýmaǵynda «Quqyqtyq tártip» jedel-profılaktıkalyq is-sharasy ótkizilip jatyr. Operatsııanyń 3 kúninde kólikti mas kúıde basqarǵan 18 júrgizýshi anyqtaldy», - deıdi SQO polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatov.
Sondaı-aq, polıtseıler oblys joldarynda jyldamdyq rejımin buzýdyń 128 faktisin, jaıaý júrginshiler ótkelinen ótý erejelerin buzýdyń 33 deregin, qarsy baǵytqa shyǵyp ketýdiń 4 faktisin anyqtady. Budan bólek, kólikti tıisti qujatsyz basqarǵan 17 júrgizýshi jaýapqa tartyldy. Jalpy jyl basynan SQO-da 177 mas júrgizýshi anyqtaldy.
