SQO-da mas kúıinde kólik júrgizgen 30 adam sottaldy
PETROPAVL. QazAqparat – Soltústik Qazaqstan oblysynda bıyl kólikti mas kúıde tizgindegen 30 adam sottalsa, sonyń 12-si bas bostandyǵynan aıyryldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, eń úlken jazaǵa Maǵjan Jumabaev aýdanynyń turǵyny tartyldy. Ol 4 jylǵa bas bostandyǵynan aıyryldy. Eki jyl buryn mas kúıinde kólik júrgizgeni úshin kólikti basqarý quqyǵynan aıyrylǵan 31 jastaǵy soltústikqazaqstandyq taǵy da rýlge otyrǵan. Osy jyldyń sáýir aıynda ol mas kúıinde velosıpedshini qaǵyp ketti. Atalǵan fakti boıynsha qylmystyq is qozǵaldy, QR QK 346-babynyń 2-bóligi belgili bir laýazymdardy atqarý nemese belgili bir laýazymmen aınalysý quqyǵynan ómir boıyna aıyra otyryp, 4 jyldan 6 jylǵa deıin bas bostandyǵynan aıyrý túrindegi jazany kózdeıdi.
«Bıyl osyǵan deıin mas kúıinde kólik júrgizgeni úshin kólik basqarý quqyǵynan aıyrylǵan 30 soltústikqazaqstandyq sottaldy. Olardyń 12-si 6 aıdan 4 jylǵa deıin bas bostandyǵynan aıyryldy. Sondaı-aq barlyǵy endi ómir boıyna kólik basqara almaıdy. 8 qylmystyq is qazir sotta qaralyp jatyr. Qazirgi ýaqytta osyndaı alty fakti boıynsha tergeý júrgizilýde», - deıdi SQO PD anyqtaý basqarmasynyń bastyǵy Erbol Bekturov.
Tımırıazev aýdanynyń Dokýchaevo aýylynda ótken demalys kúnderi polıtsııa qyzmetkerleriniń toqtatý týraly talabyn elemegen mas júrgizýshi ustaldy. «VAZ»-dy tizgindegen er adam ortasha dárejede mas bolǵan. Júrgizýshige qatysty polıtsııa qyzmetkeriniń talaptaryn oryndamaý faktisi boıynsha QR Ákimshilik quqyq buzýshylyq týraly Kodeksiniń 613-baby 1-bóligi boıynsha ákimshilik hattama toltyryldy. Sondaı-aq, sotqa deıingi tergeý júrgizilip jatyr. Ol kólik júrgizý quqyǵynan ómir boıyna aıyrylýy múmkin.
