SQO-da mas kúıde úsh adamdy óltirgen er adam 25 jylǵa sottaldy

PETROPAVL. KAZINFORM – Soltústik Qazaqstan oblysynda qyzǵanyshtan úıdi órtep, saldarynan úsh adam mert bolǵan qylmystyq is boıynsha sot aýyl turǵynyna úkim shyǵardy.  

SQO prokýratýrasynyń málimetinshe, SQO qylmystyq ister jónindegi mamandandyrylǵan aýdanaralyq soty mas kúıde jasalǵan adam óltirý jáne adam óltirýge oqtalý boıynsha isti qaraǵan edi.

Oqıǵa byltyr 17 qyrkúıekte SQO M.Jumabaev aýdany Poltavka aýylynda boldy. Spırttik ishimdik ishýdiń sońy janjalǵa ulasqan. B. áıeldi qyzǵanyp, barlyǵy uıyqtaýǵa jatqan kezde úıge órt qoıǵan. Saldarynan úsh adam mert bolyp, bireýi aman qaldy. 

Bultartpas dálelderdiń, keltirilgen zardaptyń aýyrlyǵyn jáne jeńildetetin mán-jaılardyń bolmaýy negizinde, sot kinálige 25 jylǵa bas bostandyǵynan aıyrý jazasyn kesti.

Alqabıler sottalýshynyń mas kúıde bolǵanyna qaramastan, qasaqana áreket etip, sońy asa aýyr zardapqa ákelgenin moıyndady.

Úkim zańdy kúshine endi.

Esterińizge salaıyq, órt sóndirý barysynda úıden 57 jastaǵy áıeldiń, 44 jáne 46 jastaǵy eki er adamnyń múrdesi tabylǵanyn jazǵan edik.