SQO-da mas kúıde kóshede jatqan ákim jumystan qýyldy

PETROPAVL. QazAqparat - Soltústik Qazaqstan oblysynda ádep keńesi qoǵamdyq orynda mas kúıde júrgen Tımırıazev aýdanynyń Tselınnyı aýyldyq okrýginiń ákimi Aqan Qoıshybaevqa qatysty tártiptik isti qarady, dep habarlaıdy QazAqparat tilshisi.

Qyzmettik tekseris materıaldaryna qaraǵanda, demalysta júrgen aýyl ákimin ishki ister jelilik bóliminiń qyzmetkerleri «Petropavl» stansasynda ustap, ákimshilik hattama toltyrǵan. Sheneýnikke 5 AEK mólsherinde aıyppul salyndy.

«Qoıshybaevtyń aıtýynsha, ol bir bótelke syra iship, sodan mazasyzdanǵan. Biraq medıtsınalyq saraptama nátıjesinde oǵan «ortasha aýyr alkogoldik mastyq» dıagnozy qoıyldy», - deıdi memlekettik qyzmet salasyndaǵy baqylaý basqarmasynyń bas mamany Nurgúl Qahabaeva.

Ákimshilik quqyqbuzýshylyq týraly qaýly zańdy kúshine engen.

Ádep keńesiniń músheleri Qoıshybaevtyń ákimshilik jaýapqa tartylǵanyna tekseris júrgizdi. Keńes tóraǵasy, memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Ǵalym Tursynbaev sheneýniktiń bul áreketin Memlekettik qyzmet týraly zańdy buzý dep baǵalady.

«Onyń nelikten polıtsııanyń nazaryna ilikkenin aıtaıyn. Medıtsınalyq saraptamaǵa qaraǵanda, ol kóshede ózdiginen qımyldaýǵa shamasy kelmeı jatqan. Kóshede jatqan kez kelgen sheneýnik memlekettik qyzmet atqarmaýy tıis», - deıdi Ǵ. Tursynbaev.

Ádep keńesiniń músheleri Tımırıazev aýdanynyń ákimine Qoıshybaevty laýazymynan bosatýdy usyndy.