SQO-da mas kúıde kólik júrgizgen aýyl turǵyny qamaýǵa alyndy
PETROPAVL. QazAqparat – Soltústik Qazaqstan oblysynda eki aı ótpeı qaıta mas kúıde kólik júrgizgeni úshin Sýhorabovka aýylynyń turǵyny qamaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 14 qarashada Shal aqyn aýdany polıtsııa bóliminiń patrýldik polıtsııa qyzmetkerleri dala jolynda kele jatqan kólikti toqtatady. Rýlde Sýhorabovka eldimekeniniń 30 jastaǵy turǵyny otyrǵan. Medıtsınalyq kýálandyrý júrgizýshiniń alkogoldik mas kúıde ekendigin kórsetti.
Teksere kele, onyń buǵan deıin de kólikti mas kúıde júrgizgeni anyqtaldy. Sol úshin 2018 jyly Aqmola oblysynyń Býrabaı aýdandyq sotymen úsh jylǵa kólik quralyn júrgizý quqyǵynan aıyrylǵan eken. Alaıda bul oqıǵa oǵan sabaq bolmaǵan sııaqty. Zańdy elemeı ol rýlge qaıta otyrǵan.
Bıyl qyrkúıekte Shal aqyn aýdandyq soty aýyl turǵynyn ómir boıyna kólik quralyn júrgizý quqyǵynan aıyryp, 2 jylǵa bas bostandyǵyn shekteýge úkim shyǵardy. Endi mine, eki aı óter-ótpesten qaıta mas kúıde ustaldy.
Shal aqyn aýdanynyń tergeý sýdıasy kúdiktige qatysty eki aıǵa qamaqqa alý túrindegi bultartpaý sharasyn sanktsııalady. Ol ustalyp, Shal aqyn aýdany polıtsııa bóliminiń ýaqytsha ustaý ızolıatoryna qamaldy.
Jyl basynan QR Qylmystyq kodeksiniń «Kólik quraldaryn júrgizý quqyǵynan aıyrylǵan, alkogoldik, esirtkilik masań kúıdegi adamnyń kólik quralyn júrgizýi» baby boıynsha Sotqa deıingi tergep-tekserýlerdiń biryńǵaı tizilimine 69 materıal engizildi. Eki jaǵdaıda zańdy elemegenderge qatysty «qamaqqa alý» bultartpaý sharasy tańdaldy.
