SQO-da mas kólik júrgizýshisi jol apatyn jasady
PETROPAVL. QazAqparat – Soltústik Qazaqstan oblysynda Mamlıýtka qalasynyń turǵyny rólge mas kúıde otyryp, jol apatyn jasady. Onyń qasynda 4 jasar uly bolǵan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Mamlıýtka qalasynyń 45 jastaǵy turǵyny 4 jastaǵy ulymen Petropavlǵa kelgen. «VAZ-21120» kóligin tizgindegen ol oblys ortalyǵynda eki bótelke syra ishken. Keıin qala shetindegi qozǵalys az kóshelerdiń birinde qarsy baǵyttaǵy «Volkswagen Passat» avtokóligimen soqtyǵysqan. Jol apatynan eshkim zardap shekpedi, tek kólikter mehanıkalyq zaqym aldy. Jalpy keltirilgen shyǵyn shamamen 200 myń teńgeden astam.
Júrgizýshige qatysty QR Ákimshilik quqyq buzýshylyq týraly kodeksiniń 608-baby «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» boıynsha materıal jınaldy.
«Tórt jasar bala anasy kelip alyp ketkenshe ıývenaldyq polıtsııanyń qaraýynda boldy. Avtomashına arnaıy turaqqa qoıyldy. Júrgizýshige sot úkimimen 20 táýlikke qamaqqa alý túrindegi jaza taǵaıyndaldy. Budan basqa, ol 7 jylǵa kólik júrgizý quqyǵynan aıyryldy. Masań kúıde rólge otyrýǵa jol beretin júrgizýshiler óz ómirin ǵana emes, jolaýshylary men ózge jol qozǵalysyna qatysýshylardyń taǵdyry men densaýlyǵyn qaterge tigetinin esten shyǵarmaǵan jón», - deıdi Mamlıýt aýdany polıtsııa bóliminiń bastyǵy Serik Áljanov.
Jyl basynan beri Mamlıýt aýdanynyń aýmaǵynda polıtseıler alkogoldik masań kúıde bolǵan 11 júrgizýshini ustady. Oblys boıynsha 219 mas júrgizýshi ustaldy.
