SQO-da mamyr aıynda joǵalǵan er adamdy aýyldasy óltirgen bolýy múmkin
PETROPAVL. QazAqparat – Soltústik Qazaqstan oblysynda mamyr aıynyń basynda iz-tússiz joǵalǵan Sergeı Bagınskııdiń denesi tabyldy. Qylmys jasady degen kúdikpen Kellerovka aýylynyń turǵyny qamaýǵa alyndy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Taıynsha aýdany Kellerovka aýylynda iz-tússiz joǵalǵan 57 jastaǵy Sergeı Vladımırovıch Bagınskııdiń denesi tabyldy. Er adamnyń qaıtys bolý sebebin anyqtaý úshin sot-medıtsınalyq saraptama taǵaıyndaldy.
Bagınskııdi aýyldasy óltirgen bolýy múmkin. Kinásin moıyndap, polıtsııaǵa ózi kelgen 43 jastaǵy er adam qamaýǵa alyndy. Osy fakti boıynsha QR Qylmystyq kodeksi 99-babynyń 1-bóligi «Adam óltirý» boıynsha sotqa deıingi tergeý bastaldy.
«Qazirgi ýaqytta qylmystyq is boıynsha istiń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Kúdiktige qatysty qamaýǵa alý túrindegi bultartpaý sharasy tańdaldy», - delingen baspasóz habarlamasynda.
Esterińizge salaıyq, Sergeı Bagınskıı 2 mamyr kúni Taıynsha aýdany Kellerovka eldi mekenindegi úıinen belgisiz jaqqa ketip, qaıtyp oralmaǵan edi. Ózdiginen taba almaǵan týystary 8 mamyr kúni polıtsııaǵa habarlasyp, kómek surady .
Alǵashqy izdestirý nátıje bermegendikten, bul jumysqa aýyl turǵyndary, volonterler, belsendiler, muǵalimder men órt sóndirýshiler jáne basqa da mekemelerdiń qyzmetkerleri tartyldy. Áleýmettik jelide joǵalǵan er adamnyń baǵdary berildi. Bagınskııdiń denesi shilde aıynyń sońynda tabyldy.
