SQO-da mamandar qurylys salasyndaǵy negizgi máselelerdi atady
PETROPAVL. KAZINFORM – Soltústik Qazaqstan oblysynda qurylys kompanııalary jobalardy júzege asyrýda birqatar qıyndyqqa tap bolady.
Bul máseleler SQO kásipkerler palatasynda Qazaqstan qurylysshylary odaǵy basshylyǵynyń qatysýymen ótken kóshpeli keńeste aıtyldy. Respýblıkalyq qoǵamdyq uıymnyń resýrsyn paıdalanyp, problemalardy Úkimet pen profıldi mınıstrlikke jetkizý maqsatynda uıymdastyrylǵan jıynǵa oblystyń jergilikti qurylys kompanııalarynyń ókilderi qatysty.
Odaq fılıalynyń jáne kásipkerler palatasyndaǵy salalyq keńestiń tóraǵasy Ámirjan Shákeıdiń aıtýynsha, qazir salada eń ózekti úsh másele bar, olar: qurylys alańdarynyń daıyn bolmaýy, ınjenerlik jelilerdiń joqtyǵy jáne baǵanyń durys qurylmaýy.
– Qurylysty bastaıyq desek, ol alań áli daıyn bolmaı shyǵady. ıAǵnı, tenderler áli eski ǵımarattar súrilmegen jer ýchaskelerine jarııalanady. Keıde jańa salynǵan úı paıdalanýǵa berilse de, onyń aýmaǵynda áli de turǵyndary bar nysandar turady. Ekinshiden, ınfraqurylym qurylystan bir qadam alda bolý kerek, biraq is júzinde ınjenerlik jeliler kóbine daıyn úılerge ǵana jetkiziledi, - deıdi Ámirjan Shákeı.
Spıkerdiń aıtýynsha, baǵa óńir ereksheligi eskerilmeı birtutas erejelerge súıene otyryp belgilenedi. Sol sebepti smetalyq quny men naqty shyǵyndar arasynda aıyrmashylyq paıda bolyp, qurylys toqtap, jobalyq qujattar birneshe ret túzetiledi.
– Óńirde tsement pen ınertti materıaldardy óndiretin zaýyt joq, al smetalyq esepte kóbine qymbat logıstıka eskerilmeıdi. Sondaı-aq Qazaqstannyń oblystarynda páterlerdiń baǵasy birdeı bola almaıdy. Bizde Almaty, Astana, Shymkent qalalaryna bir baǵa, al qalǵan óńirlerge bir baǵa bekitedi. Baǵa jobalyq-smetalyq qujat negizinde qalyptasýy tıis. Jobalaýshylar eseptegendeı jáne anyqtaǵandaı bolýy kerek. Bizdiń óńirdi alsaq, nege munda páterler eń qymbat dep tańǵalamyz? Sebebi táýelsizdik jyldary bizdiń oblysta qajetti qurylys materıaldaryn óndiretin birde-bir óndiristik nysan salynbaǵan, - deıdi Ámirjan Shákeı.
«Osnovanıe» JShS dırektory Sergeı Tımofeev kadr tapshylyǵy men birtutas ýaqyt beldeýine aýysýdyń qıyndyq týdyratynyn aıtty. Qysqy ýaqytta kún erte batyp, qaýipsizdik úshin jumysty erte aıaqtaýǵa májbúr. Jazda kún tańǵy 3-ten bastap shyǵady. Kásipker jumys kestesin óńirlik deńgeıde ıkemdeý múmkindigin qarastyrýdy usyndy.
Sonymen qatar Sergeı Tımofeev jańa shaǵyn aýdandarda keshendi josparlaýdyń joqtyǵyn synǵa aldy. Mysaly, úlgili bolýy tıis Kopaı shaǵyn aýdany ınfraqurylymmen tolyq qamtamasyz etilmegen.
– Qazir ol jerde shamamen 6–7 úı salynǵan, biraq jeliler tartylmaǵan, bul problema jyl saıyn qaıtalanady. Meniń oıymsha, bul búgingi kúnniń eń basty máseleleriniń biri, - dedi Sergeı Tımofeev.
Kezdesýde qurylysshylar men jergilikti bılik arasyndaǵy baılanystardy kúsheıtý qajettigi aıtyldy. Jergilikti qurylysshylardyń usynystary men eskertýleri odaq jumysynyń respýblıkalyq deńgeıdegi baǵyttaryn qalyptastyrýǵa negiz bolmaq.
Buǵan deıin qaı óńirde qurylys qarqyny artqanyn jazǵan edik.