SQO-da malshyǵa jaı túsip, atymen birge mert boldy

PETROPAVL. QazAqparat – Soltústik Qazaqstan oblysynda 31 jastaǵy er adam naızaǵaı túsip qaıttys boldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 25 mamyr kúni Aqqaıyń aýdandyq polıtsııa bóliminiń kezekshi qyzmetkerlerine osy aýdandaǵy Daıyndyq jáne Lenınskoe aýyldarynyń arasyndaǵy alqaptan er adamnyń máıiti tabylǵandyǵy týraly telefon arqyly habarlama kelip tústi.

31 jastaǵy jigit baqtashy retinde jumysqa ornalasyp, jaıylymda aýyldyń malyn baqqan eken. Oǵan sol kúni jaı túskeni belgili boldy. Saldarynan er adamnyń mingen jylqysy da oqıǵa ornynda jan tapsyrdy.

Osy derekke qatysty tergeý áreketteri júrgizilýde, sot-medıtsınalyq saraptama taǵaıyndaldy.

Buǵan deıin Oralda eki avtokóliktiń soqtyǵysyp, 8 jasar balanyń zardap shekkenin aıtqan edik. BQO polıtsııa departamentiniń málimetinshe, oqys oqıǵa tańǵy 8.00 shamasynda bolǵan. «Reno Logan» avtokóligi men «Prıora» soqtyǵysyp, «Prıora» avtokóliginiń júrgizýshisi men «Reno Loganda» otyrǵan 8 jasar bala aýrýhanaǵa jetkizildi.