SQO-da malshylar mektebi ashyldy
PETROPAVL. KAZINFORM – Soltústik Qazaqstan oblysyndaǵy aýyl sharýashylyǵy ǵylymı-zertteý ınstıtýtynda fermerlerdiń bilimin arttyrýǵa arnalǵan malshylar mektebi ashyldy.
SQO-da mal sharýashylyǵy qarqyndy damyp keledi. Máselen, elimizde óndiriletin barlyq súttiń 10%-y qazirgi ýaqytta osy óńirge tıesili.
SQO aýyl sharýashylyǵy jáne jer qatynastary basqarmasynyń málimetinshe, qazirgi ýaqytta oblysta 106 sút fermasy jumys istep tur. Onyń 38-i – zamanaýı.
Osylaısha sátti júzege asqan pılottyq joba endi el boıynsha qolǵa alynyp jatyr. Byltyr respýblıkalyq bıýdjetten zamanaýı fermalar qurylysyna 100 mlrd teńge bólinse, onyń 17 mlrd teńgesi SQO-ǵa berildi. Qazirgi ýaqytta taǵy da 18-in salý máselesi sheshilip jatyr.
«2010 jyldan bastap oblysqa shetelden kóptep mal ákelinip jatyr. Olardyń kútimi ózgeshe, solardyń jemshóbin daıyndaý, berý, onyń quramy qandaı bolýy tıis - munyń bári alyp otyrǵan et-sútimizge áser etedi. Zaman bir orynda turmaıdy, bul salada da jańashyldyqtar bar. Maldy azyqtandyrýda, jemshóp daıyndaýda, selektsııada, genetıkada – jalpy kútip-baptaýda kóptegen ózgeris bar. Malshylar mektebiniń maqsaty – mal ósirýmen aınalysatyn sharýashylyqtardyń ókilderin jańa tehnologııalarmen tanystyrý, osy saladaǵy jańalyqtarmen bólisý, biliktilikterin arttyrý. Oblystyń ár aýdanynan 2-3 mamannan qatysyp jatyr. Sondaı-aq Aqmola men Qostanaı oblystarynyń ókilderi qatysýǵa tilek bildirdi», - deıdi SQO aýyl sharýashylyǵy ǵylymı-zertteý ınstıtýtynyń basqarma tóraǵasy Altynbek Abdýllaev.
Dáris oqýǵa «Qazaqsut» iri qara maldyń sút jáne aralas tuqymdarynyń respýblıkalyq palatasynyń ókilderi, S.Seıfýllın atyndaǵy qazaq agrotehnıkalyq ýnıversıtetiniń ǵalymy, Almaty qalasynan sarapshylar keldi.
«Ózimizdiń osy ǵylymı ınstıtýtymyzda aýyl sharýashylyǵy ǵylymdarynyń 8 kandıdaty bar. Bir ǵylym doktorymyz bar. Sol kisilerdiń kúshimen osy sabaqtardy ótkizetin bolamyz. Sondaı-aq aýyldaǵy sút fermasyna baryp, tájirıbe júzinde kórsetemiz. Dárister úsh kúnge shaqtalǵan. Bilim alýǵa kelgenderdiń barlyq shyǵynyn kóterip jatyrmyz», - deıdi Altynbek Abdýllaev.
Malshylar mektebi jyl sońyna deıin jumys istemek.
