SQO-da malǵa arnalǵan aıyp turaǵy ashyldy
SQO Polıtsııa departamenti baspasóz qyzmetiniń málimetinshe, 15 tamyzdan bastap maldy baǵýǵa qatysty ereje kúshine endi. Bul – mal urlyǵynyń aldyn alýǵa qatysty jasalyp otyrǵan shara. Alǵash ret «baǵýsyz mal» atty zańdy túsinik engizilip, endi onyń ıeleri ákimshilik jaýapkershilikke tartylmaq. Maldy bos qoıa bergenderge budan bylaı aıyppul qarastyrylǵan. Mal ıeleri túlikti ózderi baǵýy kerek, ne bolmasa baqtashyǵa berýi tıis. Bul jaǵdaıda úsh jaqty kelisimshart toltyrylyp, baqtashynyń mal ıeleri aldyndaǵy mindettemesi kórsetiledi.
Mamlıýt aýdanynda tártip saqshylary alǵashqylardyń biri bolyp baǵýsyz malǵa arnalǵan aıyp turaǵyn ashty. Jergilikti atqarýshy bılik ókilderiniń jáne kásipkerlerdiń kómegimen 11 arnaıy qora salyndy.
23 tamyz kúni bul qashalarǵa alǵashqy mal toǵytyldy. Polıtseıler Meńgeser kóliniń janynda ıesiz júrgen 32 jylqyny kórgen. Baqtashysy bolmaǵandyqtan ıesiz mal aıyp turaǵyna qamaldy.
«Baqtashysy bolmaǵany bir bólek, jylqylarǵa tańba salynbaǵan eken. Sol sebepti bul maldyń ıesin tabý ońaıǵa soqpady. Al jylqylar joǵalsa nemese ony urlap ketse olar bul maldyń ıesi ekenin qalaı dálelder edi», - deıdi Mamlıýt aýdandyq polıtsııa bóliminiń bastyǵy Serik Áljanov.
Maldyń ıeleri sol kúni tabyldy. Olar Meńgeser aýylynyń úsh turǵyny bolyp shyqty. Ákimshilik jaýapkershilikke tartylyp, aıyppul tólegennen keıin jylqy ıelerine qaıtaryldy.
«Bos júrgen mal urylarǵa ońaı olja. Qaraýsyz mal avtokólik júrgizýshilerge de qaýipti. Qańǵyrǵan maldy tabý úshin polıtsııa bólimine qyzmetkerlerdi jumyldyryp, kúsh jumsaý qajet. Sondyqtan endi buǵan jol bermeýimiz kerek. Oblystyń keı aýdandarynda mal baǵylyp, baqtashylarmen, jergilikti ákimdikpen úsh jaqty kelisim jasaldy. Nátıjesinde mal urlyǵy birden azaıdy. Ereje boıynsha turǵyndarǵa maldaryn tańbalap, en salý mindetteldi. Buryn tek usynys bolatyn. Endi aýyrǵan maldy óriske jiberýge tyıym salyndy», - deıdi SQO PD bastyǵynyń orynbasary Rýslan Nazarov.
SQO-da qańǵyrǵan maldy qamaýǵa arnalǵan 54 turaq ázirlendi. Túlik ıeleri anyqtalǵansha deıin jergilikti atqarýshy bıliktiń qarajatyna baǵylady. Jalpy, ereje kúshine engeli arnaıy turaqtarǵa 88 mal qamaldy.
