SQO-da maldyń ashtan qyrylyp jatqany ras pa

PETROPAVL. KAZINFORM – Soltústik Qazaqstan oblysynyń ákimi Ǵaýez Nurmuhambetov beıresmı jaǵdaıda óńirdiń tilshiler qaýymymen kezdesti. Óńirde qolǵa alynatyn iri jobalarmen tanystyryp, jýrnalısterdiń suraqtaryna jaýap berdi.

SQO-da qazirgi ýaqytta ózekti másele kóp: qalyń jaýǵan qardyń eldi mekenderden der kezinde shyǵarylýy, kóktemgi sý tasqyny saldaryn barynsha azaıtý, joldardyń sapasy.

Sondaı-aq jurttyń qysqa daıyndaǵan jem-shóbi azaıyp, uzynnyń qysqarǵan, jýannyń jińishkerip, jińishkeniń úziler shaǵy.

Qoıan jyly ádettegideı mal úshin jaısyz boldy. Osyǵan oraı tilshiler SQO ákiminen mal shyǵyny jaıynda surap bildi. 

Óńir basshysynyń aıtýynsha, SQO boıynsha 135 myń jylqy bar. Aqjar aýdanynda 16 myń, al 1 mln 270 myń ga aýmaqty alyp jatqan Ýálıhanov aýdanynda 21 myń jylqy ustaıdy.

Bul aýdandardyń turǵyndary qoradaǵy malyna jetkilikti mólsherde qysqa shóp-saban jınap alǵan. Sharýashylyqtarda da mundaı másele joq. 

«Bıyl qys jaǵdaıy óte qıyn. Qysta jańbyr jaýyp, qatyryp tastady. Qazir qaı aýdanǵa barsańyz da, jabaıy janýarlar — elik, maraldar joldardyń, aýyldardyń mańynda júr. Óıtkeni tebindeı almaıdy. Birer kún buryn Ýálıhanov aýdanyndaǵy Qaırat pen Jasqaırat aýyldaryna baryp, halyqpen kezdesip, jaǵdaıdy bildim. Jalpy óńirde maldyń jappaı qyrylý faktileri tirkelgen joq. Biren-saran bar. Ólgen mal shetten kelip, úıirge jylqylaryn qosqandardyki. ıAǵnı maldy ákelip qosady, ol qysy-jazy jylqyshynyń baqylaýynda dalada júredi. Bıylǵydaı qalyń qarda, kók muzda olar tebindeı almaı, saldarynan biren-saran ólgen mal bar. Muny estigennen keıin kásipkerlermen sóılesip, arzan baǵada jem-shóp ala bardyq. Malǵa azyq jibergen jigitterge alǵys aıtamyn», — dedi Ǵaýez Nurmuhambetov.

Oblys ákiminiń aıtýynsha, aýdan, aýyl ákimi ózine bekitilgen aýmaqtaǵy jaǵdaıdy bilip, bir-eki aıǵa buryn boljap otyrý kerek. 

«Qazir aýdandarda esebi joq, eshqaıda tirkelmegen mal kóp. Ol qaıdan keldi, ıesi kim, qysqa tıisinshe jem-shóp daıyndady ma, qaı jerde jaıylyp júr — habardar bolyp otyrýy tıis. Eger qys qatty bolsa jylqylarmen ne isteısiń? — dep suraýy kerek. Bul — halyqtyń maly ǵoı. Aýyl sharýashylyǵy basqarmasyna, birinshi orynbasaryma, veterınarlyq dárigerlerge sońyn, ıaǵnı kóktemgi sý tasqyny men kúnniń jylynýyn kútpeı anyqtaýdy tapsyrdym. Dalada ólgen nemese aryq mal bolsa jınap alý qajet», — dedi Ǵaýez Nurmuhambetov.

Aqjar, Ýálıhanov aýdandaryna arzandatylǵan baǵamen shóp pen saban tıelgen alǵashqy kólikter keldi. Bul máseleni SQO ákimi jeke baqylaýynda ustamaq.