SQO-da mal urylarynan qorǵaný úshin jańa tehnologııalar qoldanylyp jatyr
PETROPAVL. QazAqparat – Soltústik Qazaqstan oblysynda kásipkerler mal urylarynan qorǵaný úshin túrli jańashyldyqtardy óz sharýashylyqtaryna engizip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Jambyl aýdanynda iri sharýa qojalyqtarynyń basshylary men fermerler mal urylarymen kúresý úshin tehnıkalyq jańalyqtardy paıdalanyp jatyr. Aýdandaǵy qosalqy sharýashylyqtarda 89 myńnan astam túlik bar, onyń 11 myńy — jylqy, 75 myńnan astamy — sıyr men qoı-eshki.
Profılaktıkalyq jumys úshin polıtseıler aýdandyq ákimdik jáne veterınarııa bólimderiniń ókilderimen birlese aýyldyqtarmen kezdesti. Bos júrgen maldar máselesi eń ózektilerdiń qatarynda qalyp otyr.
Ótken jyldyń qorytyndysy boıynsha aýdanda maldy ósirý jáne baǵý erejelerin buzǵany úshin 151 adam ákimshilik jaýapkershilikke tartyldy. Ruqsat qujattarysyz maldy jáne et ónimderin tasymaldaǵany úshin 20 ákimshilik hattama toltyryldy. Jergilikti atqarýshy organdarmen birlese barlyq 13 aýyldyq okrýgte qańǵybas maldarǵa arnalǵan aıyppul turaqtary ashylǵan. Bul maldaryn bos jiberetindermen kúresý maqsatynda qolǵa alynǵan.
Tártip saqshylarynyń aıtýynsha, Kazanka aýyldyq okrýgindegi «Shatılo ı K» JShS basshysy Oleg Adamnyń tájirbıesi kópke úlgi. Ol birneshe jyldan beri «Elektrondy baqtashy» dep atalatyn jańashyldyqty qoldanyp keledi. Jaıylym jer togy az symmen qorshalyp, onda 1200-deı mal jaıylady. Nátıjesinde óristen mal urlaý deregi azaıǵan.
Mal urylarymen kúresý úshin Jambyl aýdanynda 75 myń malǵa tańba salynǵan, onyń 6 553-i jylqy.
«Presnoredýt aýyldyq okrýgi ákiminiń apparatymen birge jylqylarǵa chıp qoıý boıynsha pılottyq joba qolǵa alynǵan. «Týrnov» sharýa qojalyǵynda 500 jylqy bar, onyń basym bóligine chıp qoıyldy. Jylqy malynyń syryn jaqsy biletin kásipker Maksım Týrnov úıirdi bastaıtyn aıǵyrlardyń moıyn qarǵylaryna avtonomdy izdeý qurylǵylaryn saldy. Ol mal ıesiniń uıaly telefonyna qosylǵan, chıptiń kómegimen jylqylarynyń júrgen jerin, alǵan baǵytyn kórip otyrýǵa bolady», - deıdi aýdandyq polıtsııa basqarmasynyń bastyǵy Asan Meıramov.
Byltyr bul aýdanda nebary 2 mal urlyǵy jasalyp, onyń bireýi ashyldy.
