SQO-da mal urlyǵyn ashýǵa kvadrokopter qoldanylmaq
PETROPAVL. QazAqparat - SQO-da mal urlyǵymen kúresý úshin kvadrokopterler qoldanylmaq. Polıtsııanyń aýdandyq bólinisteri drondardy satyp alyp jatyr, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, óńirde jyl basynan beri 18 mal urlyǵy tirkelgen. Qylmystyń bul túrine qarsy kúres - oblystyq polıtsııa basshylyǵynyń erekshe baqylaýynda. Polıtseılerdiń aıtýynsha, barymtashylarǵa birlese tosqaýyl qoıǵan jón.
«Mal urlyǵy kóbinese maldy erkin jaıylymǵa jiberý kezinde jasalady. Mal urlyǵynyń aldyn alýda qoldanylatyn pármendi sharalardyń biri - tańba qoıý jáne syrǵa taǵý. Atalǵan sharalar qylmystardy ashýǵa kómektesedi, sondaı-aq mal urlaýshylarǵa qarsy is-qımyl jasaýda tıimdi tetik bolyp tabylady»,- deıdi Krımınaldyq polıtsııa basqarmasynyń bastyǵy Petr Klımov.
Aıyrtaý aýdanynda polıtsııa qyzmetkerleri jeńil avtokóliktiń júksalǵyshynda eki buzaýdy áketip bara jatqan aýyldyń eki turǵynyn ustady. Buzaýlar urlanǵan bolyp shyqty. Ustalǵandardyń osyǵan uqsas taǵy úsh qylmysqa qatysy bary anyqtaldy. Mal ıelerine qaıtaryldy.
Al, Ýálıhanov aýdanynda polıtseıler eki aı kóleminde qoralardan túngi ýaqytta mal urlap júrgen kúdikti tórt adamdy ustady. Urlanǵan 5 qoıdy qaskóıler satyp úlgergen, degenmen tergeý kezinde barlyq satyp alýshylar anyqtaldy. Barlyq janýar ıelerine qaıtaryldy.
Maldardy qaıtaryp alýda olardyń eni men qoıylǵan tańbalardyń kómegi kóp. Jedel ýákilderdiń aıtýynsha, belgi salynǵan maldy tasymaldaý urlyqshylarǵa ońaı soqpaıdy. Polıtseıler derekter bazasy arqyly tasymaldanyp jatqan sıyrlar men jylqylardy tekserip, ıelerin anyqtaıdy. Sondaı-aq, tártip saqshylarymen qabyldanyp jatqan aldyn alý sharalarynyń biri - baqtashy, jergilikti atqarýshy organ jáne mal ıeleri arasynda jasalatyn úsh jaqty shart. Bul qujat baqtashylardyń jaýapkershiligin arttyra túsedi, óıtkeni tájirıbe kórsetkendeı, keı baqtashylardyń maldy qaraýsyz qaldyratyn jaǵdaılary da kezdesedi eken.
Sonymen qatar, mal urlaýshylar kóbinese jylqylardy oljalaıdy, buny aýyl turǵyndarynyń eskergeni jón, senimdi saqtyq sharalaryn qoldaný qajet. Sońǵy kezde aýdandyq polıtsııa bólimderiniń qyzmetkerleri óz jumysynda kvadrokopterlerdi jıi qoldanady. «Urlanǵan jáne joǵalǵan maldy izdeý úshin drondar jıi qoldanylady, qazirgi ýaqytta atalǵan apparattardy aýdandyq bólinister satyp alýda», - deıdi Petr Klımov.
