SQO-da mal urlyǵyna kúdikti tórt jigit ustaldy
PETROPAVL. KAZINFORM – Soltústik Qazaqstan oblysynda 20-24 jastaǵy tórt jigit qylmystyq top quryp, Taıynsha aýdanynda jurttyń malyn urlady degen kúdikpen tergelip jatyr.
SQO Polıtsııa departamenti baspasóz qyzmetiniń málimetinshe, qolǵa túsken kúdiktiler – jergilikti turǵyndar. Olar Taıynsha aýdanynyń aýyldary men aýdan ortalyǵynda sáýir aıynyń basynan beri áreket etken. Jigitter qoralardan qoı urlaǵan.
Aıta keterligi, mal ıeleriniń eshqaısysy janýarlardyń joǵalǵanyn óz betinshe baıqamaǵan. Qylmystar polıtsııanyń kúndelikti jedel-profılaktıkalyq jumysy barysynda anyqtaldy.
Aýdan ortalyǵyndaǵy beınebaqylaý kameralary kúdiktilerdiń biriniń urlanǵan maldy «VAZ 2112» avtokóliginiń júksalǵyshy men salonynda tasymaldap, satyp alýshyǵa jetkizgenin tirkegen. 1 mamyr kúni, maldy ótkizgennen keıin olar birden ustaldy.
Qazirgi ýaqytta mal urlyǵynyń tórt deregi boıynsha tergeý júrgizilip jatyr. Barlyǵy 23 qoı urlanǵan. Onyń 12-si satyp alýshylardan alynyp, ıelerine qaıtaryldy. Kúdiktilerdiń ózge de uqsas qylmystarǵa qatysy tekseriledi. Sondaı-aq, urlanǵan maldy satyp alýshynyń jaýapkershiligi máselesi de qaralyp jatyr.
Polıtseıler aýyl turǵyndaryn qyraǵy bolýǵa, qora-qopsy, maldaryn urylardan qorǵaý boıynsha ózge de sharalar qabyldaýǵa shaqyrady. Jyl basynan beri SQO-da 6 mal urlyǵy tirkelip, olardyń barlyǵy ashyldy.
Buǵan deıin Almaty oblysynda 43 bas mal urlaǵan barymtashylar ustalǵanyn jazǵan edik.
