SQO-da mal urlaýmen aınalysqan eki adam ustaldy

PETROPAVL. QazAqparat – Soltústik Qazaqstan oblysynda mal urlyǵymen aınalysyp kelgen eki er adam ustaldy, ekeýi de buryn sottalǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Mamlıýt aýdanyndaǵy aýyldardyń birinde baqtashynyń baılaýdaǵy jylqysy joǵalady. Óz kúshimen izdeý esh nátıje bermedi. Keıin tabyn ıesi Mamlıýt aýdanynyń polıtsııa bólimine júgingen. Ýaqyt ótkendikten qylmyskerdi izin sýytpaı ustaý múmkin bolmady. Alaıda polıtseıler jedel-izdestirý is-sharalary nátıjesinde eki kúdiktini anyqtady.

Onyń biri – Qyzyljar aýdanynyń buryn múliktik qylmystar jasaǵany úshin sottalǵan 34 jastaǵy turǵyny bolyp shyqty. Bıyl ol eski ádetine basyp, Jambyl aýdanynda eki qoı urlaǵany úshin ustaldy. Sol kezde er adam mal ıesimen tatýlasyp, jazadan qutyldy. Endi onyń jábirlenýshilerdiń keshirimin alýyna jol joq. Ekinshisi - buryn qaraqshylyq úshin sottalǵan 43 jastaǵy Petropavl turǵyny. Kúdiktilerdiń aýdan aýmaǵynda taǵy bir jylqy men úsh qoshqardy urlaýǵa qatysy bary anyqtaldy. Atalǵan faktiler «Mal urlaý» baby boıynsha Sotqa deıingi tergep-tekserýlerdiń biryńǵaı tizilimine engizildi.

«Kúdiktilerdiń aıtýynsha, olar jalǵa alǵan kólikpen erkin jaıylymda júrgen nemese qaraýsyz qalǵan maldardy ańdyǵan. Keıin maldardy biriniń jer úıiniń aýlasynda múshelegen, sol úshin qasapshylardyń qyzmetin paıdalanǵan. Qairgi ýaqytta kúdiktiler tergeý ızolıatorynda qamaýda otyr», - deıdi aýdandyq polıtsııa bólimi bastyǵynyń mindetin atqarýshy Isa Mustafın.

Jyl basynan oblysta 18 mal urlaý faktisi tirkelip, búgingi tańda onyń 16-sy ashyldy.