SQO-da mal urlaǵan ekeý mas kúıinde kólik júrgizgeni úshin ustaldy
PETROPAVL. QazAqparat – Soltústik Qazaqstan oblysynda eki jigit kásipkerdiń qorasyna túsip, eki buzaý urlaǵan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, urlyq 7 shilde kúni Jambyl aýdanynda bolǵan. Mal ósirýmen aınalysatyn kásipker qorshaý ishinde turǵan eki buzaýyn ornynan tappaı, polıtsııa bólimine aryzdanady. Kelgen shyǵyn somasy - 120 myń teńge. Bul derek «Mal urlaý» boıynsha tergep-tekserýdiń biryńǵaı tizilimine engizildi.
Jedel-izdestirý is-sharalary barysynda eki kúdikti anyqtaldy. Olar 28 jáne 25 jastaǵy Shal aqyn aýdanynyń turǵyndary bolyp shyqty. 1992 jylǵy jigit buryn sottalǵan. 11 shildege qaraǵan túni ekeýin toqtatqan polıtseıler olardyń kólikti mas kúıinde basqarǵanyn anyqtady.
Qazirgi ýaqytta kúdiktiler Jambyl aýdandyq polıtsııa bóliminiń ýaqytsha ustaý ızolıatorynda rólge mas bolyp otyrǵany úshin ákimshilik qamaýda otyr. Olardyń basqa qylmystarǵa qatysy bar-joǵy tekserilýde. Tártip saqshylary Shal aqyn aýdanyndaǵy áriptesterimen birlese júrgizgen jumys barysynda kúdiktilerdiń jýyrda Birlik aýylynda qoradan buzaý urlaǵanyn anyqtady. Bul joly da urlanǵan mal satylǵan bolyp shyqty.
«Maldyń qaıdan kelgenin suramaı satyp alǵandar urlanǵan maldy ıesine qaıtarady. Bul - bıyl Jambyl aýdanynda tirkelgen alǵashqy mal urlyǵy. Mal urlyǵynyń sany áldeqaıda azaıdy. Óıtkeni qazir mal bos júrmeı, baǵylady. Aýdandaǵy kásipkerlerdiń basym bóligi aýmaqtaryn beınebaqylaý kamerasymen jabdyqtaǵan. Zardap shekken sharýa qojalyǵynyń ıesi óz malyn urylardan saqtaý úshin qazirgi ýaqytta beınekamera ornatyp jatyr», – deıdi aýdandyq polıtsııa bóliminiń bastyǵy Asan Meıramov.
Jyl basynan beri óńirde 14 mal urlyǵy tirkeldi. Bul ótken jyldyń 6 aıymen salystyrǵanda 65,9 %-ǵa tómen. Búginde altaýy ashyldy. 10 bas mal ıelerine qaıtaryldy.
