SQO-da mal urlady degen kúdikpen Kókshetaý qalasynyń úsh turǵyny ustaldy

SQO polıtsııa departamenti baspasóz qyzmetiniń málimetinshe, Aıyrtaý aýdany polıtsııa bóliminiń qyzmetkerleri mal urlady degen kúdikpen Kókshetaý qalasynyń úsh turǵynyn ustady. Olardy qolǵa túsirý úshin polıtseıler birneshe aı boıy jedel is-sharalar júrgizdi. Qaskóıler ótken jyly kúzde túnde Qoskól aýylynda qoranyń qulybyn buzyp kirip, jylqyny jetektep ketken. Urlyqty «izin sýytpaı» ashý múmkin bolmady, alaıda izdestirý jumystary bir sátke de toqtatylmady. Aýyl mańyndaǵy ormannan janýardyń ishek-qaryny jáne terisi tabyldy.
Taǵy bir urlyq osy aýdanda bıyl kóktemde jasalǵan. Egindiaǵash aýyly turǵynynyń dalada erkin jaıylyp júrgen buqasy urlanǵan. Mal ıeleri polıtsııaǵa birneshe kúnnen soń ǵana aryzdanypty.
«Bul qylmystardyń ashylýyn baqylaýda ustadym. Mal – aýyl turǵyndarynyń keıbiri úshin jalǵyz tabys kózi. Qyrkúıekte qylmys jasady degen kúdikpen úsh kókshetaýlyq ustaldy. Búgingi kúni olar aýyldyqtardyń shyǵynyn ótedi», - deıdi Aıyrtaý aýdanynyń polıtsııa bóliminiń bastyǵy Marat Serkeshev.
Osy derekke qatysty qazirgi ýaqytta «Mal urlyǵy» baby boıynsha sotqa deıingi tergeýler júrgizilip jatyr. Baptyń sanktsııasy 5 jyldan 10 jylǵa deıin bas bostandyǵynan aıyrý jazasyn qarastyrady. Ustalǵandar qamaýda otyr.