SQO-da mal sharýashylyǵynyń kásipkerleri jerdi memleketke qaıtarýǵa mindettelip jatyr
SQO kásipkerler palatasy baspasóz qyzmetiniń málimetinshe, kásipkerler buryn jaıylymdar men shabyndyqtar úshin berilgen jer ýchaskeleri boıynsha mámilelerdi jaramsyz dep taný týraly sottan talap-aryz alyp jatyr. Olardy oblystyq Aýyl sharýashylyǵy jáne jer qatynastary basqarmasy sotqa bergen. Qazirgi ýaqytta oblystyń mamandandyrylǵan aýdanaralyq ekonomıkalyq sotynda 16 azamattyq is qozǵaldy. Zań konsýltanty Elena Prıgojenkonyń aıtýynsha, basqarma osyndaı 35 sot isin daıyndaǵan.
Talap-aryzǵa jer ýchaskeleriniń bir kezde eldi mekender sheginde jáne konkýrstar ótkizilmeı berilgeni sebep bolǵan. Keı jaǵdaılarda zań buzýshylyqtar 10, tipti 15 jyl buryn jasalǵan. Sharýalar da, kásipkerler palatasyndaǵy jumys tobynyń músheleri de kezinde sheneýnikter jibergen olqylyqtarǵa nelikten olar jaýap berýi tıis ekendigin túsinbeıdi.
«Qazir isteri sotta qaralyp jatqan sharýashylyqtar ekonomıkanyń naqty sektoryna jatady. Bul bıznes sýbektileri berilgen jer ýchaskelerin jaı ǵana paıdalanbaı, onyń sapasyn jaqsartty. Óńirde buǵan 230 mln teńgeden astam qarajat jumsaldy. Sondaı-aq 2 mlrd teńgeden astam somaǵa mal satyp alynyp, aýdandarǵa 3 mlrd teńgeden astam ınvestıtsııa salyndy. Endi oblys boıynsha aýyl sharýashylyǵy óndirýshileri shyǵyndarynyń jalpy somasy 5,2 mlrd teńgeden aspaq», - deıdi Elena Prıgojenko.
Osyndaı jaǵdaıǵa tap bolǵandardyń biri – Ǵ.Músirepov atyndaǵy aýdanda jumys jasaıtyn «Vozvyshenka SK» JShS. 2012 jyly seriktestik mal sharýashylyǵyn damytý úshin jer telimin alǵan. Osylaısha et baǵytyndaǵy mal fermasyn salyp, AQSh-tan asyl tuqymdy mal ákelindi. Ótken jyldan bastap seriktestik 1800 bas sıyrǵa arnalǵan sút-taýar fermasyn salý boıynsha jobany iske asyryp jatyr. Osy aralyqta «Vozvyshenka SK» JShS 1352 bas iri qara satyp aldy.
«Bul mal jaıylmaıdy, qorada ustaý qajet. Ol úshin jaqsy jemazyq bazasy bolýy kerek. 2014 jyly mal sharýashylyǵymen aınalysa bastaǵannan keıin bizge Vozvyshenka aýylynyń mańynda shóp shabý úshin jer berildi. Bul jerlerdi biz etti baǵyttaǵy mal sharýashylyǵy kesheniniń jem-shóp bazasynyń sapasyn jaqsartý úshin paıdalanamyz. Al bıyldan bastap saýyn sıyrlar úshin jem-shóp alý úshin paıdalanamyz. Endi osy jer ýchaskelerin qaıtarýdy talap etken is sotta qaralyp jatyr», – deıdi «Vozvyshenka SK» JShS dırektorynyń orynbasary Denıs Posovets.
Sharýalar shabyndyq, jaıylymdyq jerlerdi qaıtarýǵa týra kelse, barlyq maldy etke ótkizýden basqa amal bolmaıdy dep otyr. Al alynǵan jerler eldi meken turǵyndaryna aýyl malyn baǵýǵa berilmek.
«Bizde aýyl turǵyndarymen eshqandaı kelispeýshilik joq. Maǵan senen alynǵan jerdi Ekaterınovka eldi mekeniniń halqyna beremiz dep aıtty. Ol jerde 5 úı ǵana bar, al aýyldyń maly 25-ten aspaıdy. Bul máseleni sotqa jetkizbeı-aq sheshýge bolar edi ǵoı. Biz olarǵa maldaryn jaımasyn dep otyrǵanymyz joq», - deıdi «Atabaı» ShQ-nyń ókili Alfııa Quljabaeva.
