SQO-da laýazymdy tulǵa sot talabyn oryndamaǵany úshin aıyppul tóleıdi
PETROPAVL. QazAqparat – Soltústik Qazaqstan oblysynda sot memlekettik sáýlet-qurylys baqylaý jáne lıtsenzııalaý basqarmasynyń basshysyna aıyppul saldy, dep habarlaıdy QazAqparat tilshisi.
SQO soty baspasóz qyzmetiniń málimetinshe, memlekettik organ basshysynyń, laýazymdy tulǵa retinde SQO mamandandyrylǵan ákimshilik sotynda qaralyp jatqan eki iske qatysy bar. Bireýi boıynsha sot memlekettik organ basshysyn jaýapker retinde, ekinshisinde osy laýazymdy tulǵany múddeli tulǵa retinde tartqan.
Sot ákimshilik ister boıynsha aldyn ala tyńdaý úshin laýazymdy tulǵany memlekettik organ júrgizgen tekseriske qatysty qujattardy usynýdy mindettegen. Eki is boıynsha da merzim kórsetilgen, sodan keshiktirmeı talap etilgen tekserý qujattaryn sotqa usyný kerek bolǵan.
Alaıda sot talaby ýaqtyly oryndalmaı, qajetti qujattar usynylmaǵan. Al sottyń elektrondy poshtasyna joldanǵan siltemeler ashylmaǵan, osylaısha ol qujattardy qaraýǵa múmkindik bolmaǵan. Saldarynan sot usynylǵan dálelderdiń jetkilikti ekendigin anyqtaı almaı, sot otyrysynda ákimshilik isti qaraý múmkin bolmady.
Sot talabyn oryndamaǵany úshin laýazymdy tulǵa-memlekettik organnyń basshysy endi 10 AEK mólsherinde, shamamen 30 myń teńge aıyppul tólemek.
