SQO-da sybaılas jemqorlyqqa qarsy shara qabyldamaǵan laýazymdy tulǵa jaýapqa tartyldy
PETROPAVL. KAZINFORM – Soltústik Qazaqstan oblysynyń prokýratýrasy sybaılas jemqorlyqqa qarsy áreketter boıynsha sharalar qabyldamaǵany úshin laýazymdy tulǵany ákimshilik jaýapkershilikke tartty. Bul týraly jergilikti prokýratýra málimdedi.
Taldaý nátıjesinde «Sybaılas jemqorlyqqa qarsy is-qımyl týraly» Qazaqstan Respýblıkasy Zańynyń (budan ári — Zań) qarjylyq baqylaý sharalaryn qoldanbaý túrinde óreskel buzýshylyqtar anyqtaldy.
«Aqqaıyń aýdanynyń Іshki saıasat, mádenıet jáne tilderdi damytý bóliminiń meńgerýshisi (budan ári-Bólim) Zań talaptaryn buza otyryp, vedomstvolyq baǵynysty uıymdardyń dırektorlaryn qyzmetke taǵaıyndaý kezinde olardyń zańda belgilengen tártippen 250 úlgidegi salyq eseptiligin tapsyrý týraly habarlamalardy usyný sharalaryn qabyldamaǵan. Nátıjesinde basqarma basshysy ÁQBtK-niń 680-babynda kózdelgen, sybaılas jemqorlyqqa qarsy is-qımyl sharalaryn qoldanbaý týraly ákimshilik quqyq buzýshylyq jasaǵan. Prokýrordyń qaýlysymen bólim basshysy aıyppul túrindegi ákimshilik jaýapkershilikke tartyldy», — delingen habarlamada.
Salyq eseptiligin ýaqtyly usynbaǵany úshin ÁQBtK-niń 272-baby 1-bóligi boıynsha bólimniń vedomstvolyq baǵynysty uıymdarynyń 250 dırektory ákimshilik jaýapkershilikke tartyldy.
«Bul rette qadaǵalaý organy memlekettik organdardyń basshylaryna sybaılas jemqorlyqqa qarsy is-qımyl sharalaryn qoldanbaǵany úshin ÁQBtK-niń 680-baby boıynsha ákimshilik jaýapkershilik týraly eske salady, munda 369 200 teńge mólsherinde ákimshilik aıyppul qarastyrylǵan jáne qoldanystaǵy zańnama talaptaryn saqtaýǵa shaqyrady» — dep habarlady prokýratýra.
