SQO-da lańkestik pen ekstremızmdi nasıhattaǵan turǵyn 7 jylǵa sottaldy

PETROPAVL. QazAqparat – Petropavl qalalyq sotynyń úkimimen Taıynsha aýdanynyń turǵynyna 7 jylǵa bas bostandyǵynan aıyrý jazasy kesildi. Onyń lańkestik pen ekstremızmdi nasıhattaǵany dáleldendi, dep habarlaıdy QazAqparat tilshisi.

SQO soty baspasóz qyzmetiniń málimetinshe, Taıynsha aýdanynyń S. Esimdi turǵyny 2018 jyldyń tamyzynan 2019 jyldyń maýsymyna deıin dinı radıkaldyq baǵyttaǵy foto-vıdeo aqparatty ınternet saıttardan júktep, keıin áleýmettik jelidegi óz paraqshalarynda jarııalap, messendjerler arqyly basqalarmen bólisken.

«Materıaldardyń barlyǵy dinı alaýyzdyq týdyrýǵa, lańkestik pen ekstremızmdi nasıhattaýǵa, qarýly qaqtyǵystarǵa qatysýǵa, sonyń ishinde «qarýly jıhadqa» shyǵýǵa shaqyrady», - delingen baspasóz habarlamasynda.

Sottalýshy óz áleýmettik paraqshalarynda árkimge qoljetimdi dinı mazmundaǵy rolıkterdi ornalastyrǵanyn moınyna alǵanymen, terrorızmdi nasıhattaǵanyn teriske shyǵardy.

Sottalýshynyń kinásin dáleldeý úshin keshendi sot psıhologo-fılologııalyq jáne dinı saraptama jasalyp, teolog sarapshynyń pikiri negizge alyndy.

Taıynsha aýdanynyń 36 jastaǵy S. Esimdi turǵynynyń otbasy jáne qaraýynda kishkentaı balalarynyń bolýy oǵan artylǵan qylmystyq jaýapkershilikti jeńildetti. Alaıda sot jaza kesýde qylmystyq quqyq buzýshylyqtyń qoǵamǵa ákeler qaýpin, sottalýshynyń turaqty túrde qylmysty jasaǵanyn jáne istegen isine ókinbeıtindigin eskerdi.

Petropavl qalalyq soty S.-ny kináli dep taýyp, ony 7 jylǵa bas bostandyǵynan aıyrdy. Sottalǵan jazasyn qylmystyq-atqarý júıesiniń ortasha qaýipsizdik deńgeıindegi mekemesinde óteıtin bolady. Úkim ázirge zańdy kúshine engen joq.