SQO-da lamınattalǵan fanera shyǵaratyn kásiporyn ashylady

PETROPAVL. QazAqparat – Soltústik Qazaqstan oblysynda túrik ınvestorlarynyń qatysýymen lamınattalǵan fanera shyǵaratyn kásiporyn iske qosylmaq. Kombınat jylyna 27 myń tekshe metrge deıin ónim shyǵaryp, el qajetiniń 30 % jabýdy josparlaǵan, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, lamınattalǵan fanera shyǵaratyn kombınat – bolashaǵy zor jobalardyń biri. Ony júzege asyrýǵa túrik ınvestorlary 1,8 mlrd teńge jumsamaq.

Oblys ákimi Qumar Aqsaqalov fanera kombınatyna bardy. Buryn bos turǵan ǵımaratta qazir jumys qyzǵan. Kásiporynda Túrkııa men Germanııadan ákelingen qondyrǵylardy qosý jumystary júrgizilýde. Kombınat ashylǵanda 150 adam jumyspen qamtylady.

«Jylyna kásiporyn 18 myń tekshe metr daıyn ónim shyǵarmaq. Keıin 27 myńǵa deıin ósiredi. Ónimniń jartysy Túrkııa, Evropa men Ózbekstanǵa jóneltiledi. Qazir elimizge 90 myń tekshe metr fanera syrttan ákelinedi. Biz bul kólemniń 30 % jaba alamyz», - dedi Qumar Aqsaqalov.

Investor Ogýzhan Chelık Soltústik Qazaqstanǵa Túrkııadan arnaıy kelip, osy bıznespen aınalysyp jatyr. Aıtýynsha, Túrkııada qaıyń óspeıdi. Qaıyńdy tek peshke ǵana jaqpaı, daıyn ónim alýǵa bolady. Bul aǵash qurylys materıaly retinde qundy. Qaıyń fanerasyn tipti keme jasaýǵa da qoldanady. Al Qazaqstannyń soltústiginde ósetin qaıyń sapaly fanera jasaý úshin taptyrmaıtyn shıkizat.

Jalpy SQO-ǵa jyl basynan 11 mlrd teńge sheteldik ınvestıtsııa tartyldy. Ósim 159 % qurady. Bul óńirde ınvestorlarǵa jaqsy jaǵdaıdyń jasalǵanynyń kórsetkishi.