SQO-da qyzylshamen aýyrǵandardyń sany 237-ge jetti
PETROPAVL. QazAqparat - SQO-da qarasha aıynan bastap osy kúnge deıin 237 adamda qyzylsha aýrýy tirkeldi. Olardyń teń jartysy 14 jasqa deıingi balalar, dep habarlaıdy QazAqparat tilshisi.
Juqpaly aýrýdyń órshýine baılanysty elimizde sáýirdiń birinen bastap qyzylshaǵa qarsy qosymsha ımmýndaý bastaldy. Mamandardyń aıtýynsha, ekpe endi 9-10 aılyq sábılerge de jasalady. Sondaı-aq 40 jasqa deıingi medıtsına qyzmetkerleri de qyzylshamen aýyrǵan naýqastarmen jıi baılanysta bolǵandyqtan ekpe alýda. Infektsııa oshaqtarynda bolǵan 30 jasqa deıingi azamattar da budan tys qalmaıdy.
«Bul dertke qarsy qyzylsha, qyzamyqqa jáne parotıtke qarsy biriktirilgen vaktsına paıdalanylatyn bolady. Úndistandyq kompanııa shyǵarǵan, onyń sapasyna Dúnıejúzilik densaýlyq saqtaý uıymy kepildik beredi. Bul vaktsına álemniń 70-ten astam elinde, sonyń ishinde Qazaqstanda sońǵy 10 jyl boıy qoldanylyp keledi. Búginde preparat eldiń barlyq aımaqtaryna tolyq jetkizildi», - deıdi oblystyq Qoǵamdyq densaýlyq saqtaý departamentiniń jetekshi mamany Saltanat Bekqojına.
2018 jyldyń qarasha aıynan bastap osy kúnge deıin oblysta qyzylsha juqtyrǵan 237 jaǵdaı tirkelgen, sonyń 118-i 14 jasqa deıingi balalar arasynda. Olardyń 88,5% nemese 202 jaǵdaıda turǵyndar qyzylshaǵa qarsy ekpe almaǵan. «Qyzylshaǵa qarsy birden-bir shara - ekpe alý. Dene qyzýy kóterilgende, tamaq aýyrǵanda, konıýnktıvıt pen denede bórtpe paıda bolǵanda der kezinde dárigerge kóriný qajet. Qyzylsha asqynǵan jaǵdaıda pnevmonııanyń, nevrologııalyq buzylýlardyń damýyna ákelýi múmkin, ásirese qyzylsha entsefalıti qaýipti ekenin eskertkim keledi», - deıdi Saltanat Bekqojına.
Mamandardyń aıtýynsha, halyqty qyzylshaǵa qarsy vaktsınatsııalaý aqysyz júrgiziledi, ol úshin aýmaqtyq emhanalarǵa habarlasý qajet.
