SQO-da qyzylsha juqtyrǵandar sany 60-tan asty
PETROPAVL. QazAqparat - SQO-da jyl basynan beri 64 adam qyzylsha aýrýyn juqtyrdy. Syrqattardyń basym bóligi - eresekter, dep habarlaıdy QazAqparat tilshisi.
Qyzylshamen aýyrǵandardyń 28-i, ıaǵnı 44 % - 14 jasqa deıingi balalar. Qalǵan 36 jaǵdaı eresekter arasynda tirkelgen. Olardyń bireýi egilýden bas tartqan bolsa, 28-inde ekpeniń salynǵan-salynbaǵany jóninde derek joq, al 7-eýine vaktsına egilgen.
«Qyzylsha juqtyrýshylar sany sońǵy 15 jylda alǵash ret ortasha kórsetkishten asyp otyr. Aýrýmen kúresý úshin tıisti sharalar qolǵa alyndy. Qyzylsha dertin taratpaý jáne joıý maqsatynda shtab quryldy. Alǵashqy medıtsınalyq-sanıtarlyq kómek kórsetý, mektep, qoǵamdyq densaýlyq saqtaý qyzmetkerleri arasynda semınarlar ótkizilip, oblys turǵyndarymen túsindirý jumystary júrgizilip jatyr. Qyzylsha aýrýynyń aldyn alý týraly aqparat barlyq memlekettik organdarǵa jáne qyzyǵýshylyq bildirgen vedomstvolarǵa jiberildi. Budan basqa 8-800-08-08-103 telefon nómirimen koll-ortalyqqa habarlasyp, epıdemıolog jáne ınfektsıonıst-dárigerlerdiń aqyl-keńesin alýǵa bolady»,- deıdi SQO Qoǵamdyq densaýlyq saqtaý departamentiniń bastyǵy Serikbaı Qasmaqasov.
Mamandardyń aıtýynsha, Eýropanyń kóptegen elderinde qyzylsha aýrýynyń beleń alýyna osy dertke qarsy ekpe jumystarynyń óte tómen deńgeıde júrgizilýi sebep bolǵan. Saldarynan juqpaly dert Qazaqstan aýmaǵyna da ótip, aýrýǵa qarsy egilmegen turǵyndar arasynda kóptep taralýda.
