SQO-da qyzylsha aýrýyna shaldyǵýdyń jańa deregi tirkelgen joq
PETROPAVL. QazAqparat - Jyl basynan beri Soltústik Qazaqstan oblysynda 31 adam qyzylsha dertine shaldyqqan, dep habarlaıdy QazAqparat tilshisi.
Demalys kúnderi aımaqta aýrýǵa shaldyǵýdyń jańa oqıǵalary tirkelgen joq.
Qoǵamdyq densaýlyq saqtaý departamentiniń basshysy Serikbaı Qasmaqasovtyń aıtýynsha, 65 paıyz jaǵdaıda bul dertke 14 jasqa deıingi balalar shaldyqqan. Olardyń barlyǵyna jýyǵy ekpe jasaý jasyna jetpeýine, medıtsınalyq kórsetkishterge nemese ekpeden bas tartýyna baılanysty ekpe almaǵan.
«Qyzylsha dertine shaldyǵý kórsetkishi 100 myń turǵynnyń 5,6 paıyzyn quraǵan. Bul sońǵy 15 jylda ortasha kópjyldyq kórsetkishten 3,0 kóp bolyp otyr», - dedi S.Qasmaqasov.
Ol sońǵy jyldary Eýropanyń kóptegen elderinde qyzylsha aýrýyna shaldyǵý ósimi baıqalǵanyn qosyp ótti.
«Dúnıejúzilik densaýlyq saqtaý uıymy ony qyzylshaǵa qarsy ekpe jasaýdyń az qamtylýymen baılanystyryp otyr. Bul atalǵan indetti Qazaqstan aýmaǵyna kirgizýdiń jáne onyń egilmegen turǵyndardyń arasynda tez taralýynyń joǵary qaýpin týdyrady. Bizde jáne Eýropada taralǵan aýrýdyń shtamdary birdeı», - dep atap ótti S.Qasmaqasov.
Oblystyń bas sanıtarlyq dárigeriniń aıtýynsha, 1 aqpandaǵy jaǵdaı boıynsha qyzylsha, qyzamyq jáne parotıt dertine qarsy 1500 doza vaktsına alynǵan, Oblystyq densaýlyq saqtaý basqarmasy vaktsınanyń qosymsha kólemin satyp alý máselesin qarastyryp otyr.
Avtor: Olesıa Jýkoven
