SQO-da qyzyl pasportpen júrgen 7 adam jańadan jeke kýálik aldy

PETROPAVL. QazAqparat – Soltústik Qazaqstan oblysynda KSRO pasportymen júrgen 7 turǵyn bıyl jeke kýálikke qol jetkizdi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, elimizde 1974 jylǵy úlgidegi qyzyl tústi KSRO pasporttary qoldanystan alynǵan. Qazaqstan azamatynyń jeke basyn kýálandyratyn qujattar respýblıkada 1994 jyly engizildi. Eski pasportpen júrgen adamdar birqatar memlekettik qyzmetterdi alýǵa, tólemderdi rásimdeýde quqy shektelgen. Degenmen, turǵyndardyń arasynda qandaı da bir sebeptermen eski tólqujattarmen ómir súrip jatqandar bar.

SQO PD kóshi-qon qyzmetiniń qyzmetkerleri mundaı adamdardy qujattandyrý jumystaryn júrgizedi.

Petropavldyń 49 jastaǵy turǵyny qujattardy rásimdeýge kómek suraǵan. Kóshi-qon polıtseıleri onyń azamattyǵyn anyqtaý rásimin júrgizdi.

«Qala turǵyny úshin jeke kýálik daıyndaldy, endi ol bizdiń memleketimizdiń barlyq qyzmetterin paıdalana alady.

Eski qujattarmen júrgen soltústikqazaqstandyqtardy máseleni sheshýdi keıinge qaldyrmaýǵa jáne ózderiniń quqyqtyq mártebesin retteýge shaqyramyz», – deıdi SQO PD kóshi-qon qyzmeti basqarmasynyń bastyǵy Talǵat Ábilov.

Jyl basynan beri kóshi-qon qyzmetiniń qyzmetkerleri SQO-nyń jeti turǵynyna QR azamattarynyń kýáligin alýǵa kómektesti.