SQO-da Qyzyl kitapqa engen eki aqqýdy atqan kúdiktiler ustaldy
PETROPAVL. QazAqparat - SQO-nyń Ǵabıt Músirepov aýdanynda Qyzyl kitapqa engen eki suńqyldaq aqqýdy jáne segiz qazdy atqan kúdiktiler ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Ǵabıt Músirepov atyndaǵy aýdanda qoryqshy polıtsııaǵa Lomonosov aýyldyq okrýginde myltyq daýysyn estigenin aıtqan. Tabıǵatty qorǵaý polıtsııasynyń qyzmetkerleri, ýchaskelik polıtsııa ınspektorlary men qoryqshylar birge atalǵan aýmaqqa reıdtik shara uıymdastyrady.
Bıesoıǵan kóliniń jaǵasynda «Nissan Patrol» avtokóligin tapqan olar, sýda qaıyqtaǵy adamdardy baıqaǵan. Polıtseılerdiń motorly qaıyǵy óte almasyn bilgen kúdiktiler qamys arasyna jasyryndy.
«Shyǵatyn joldardy bógep, olardy jan-jaqtan qorshaýǵa aldyq. Kúdiktilerdiń shydamy taýsylyp, qas qaraıǵan kezde jaǵaǵa shyǵýǵa májbúr boldy. Alaıda olar ózderiniń brakonerlikke túk qatysy joq ekenin aıtyp aqtaldy»,- deıdi polıtseıler.
Brakonerler jaǵaǵa shyqqansha polıtseıler atylǵan qustardy - 8 qazdy jáne Qyzyl kitapqa engizilgen 2 suńqyldaq aqqýdy sý ishinen alyp shyqqan. Sondaı-aq, oqıǵa bolǵan jerden avtokólik, aǵash qaıyq, 12-shi kalıbrli eki myltyq pen oq-dári tárkilendi.
«Zańsyz ańshylyq jasady degen kúdikpen Qostanaı oblysynyń bes turǵyny ustaldy. Memleketke keltirilgen shyǵyn kólemi 3 mıllıon teńgeden asty. Atalǵan fakti QR Qylmystyq Kodeksiniń 337-baby «Zańsyz ańshylyq» boıynsha Sotqa deıingi tergep-tekserýdiń biryńǵaı tizilimine engizildi», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Mamandardyń aıtýynsha, aqpannyń 16-sy men maýsymnyń 14-i aralaǵynda el aýmaǵynda sý qustaryn atýǵa tyıym salynǵan.
