SQO-da qyzy esirtki taratýmen aınalyssa, ákesi qarý-jaraqty zańsyz saqtap kelgen
Soltústik Qazaqstan oblysy polıtsııa departamenti baspasóz qyzmetiniń málimetinshe, oblystyq prokýratýranyń úılestirýimen oblystyq Polıtsııa departamenti Esirtki qylmysyna qarsy is-qımyl basqarmasynyń qyzmetkerleri sıntetıkalyq esirtkini jetkizý arnasynyń jolyn kesti.
Petropavldyń buryn isti bolmaǵan 29 jastaǵy turǵyny jedel tekseris kezinde ustaldy. Ol Astana qalasynan oblys aýmaǵynda taratý úshin asa iri kólemde sıntetıkalyq esirtkini jetkizdi degen kúdikke ilinip otyr. Jeke tintý kezinde qyzdan qońyr-sarǵysh tústi untaq tárizdes zat salynǵan 20 túıinshek alyndy. Turǵylyqty jeri boıynsha polıtseıler dál osyndaı zatpen polımerlik paketterdi, ólsheý quraldaryn jáne zattyń izderi bar elektrondyq tarazyny anyqtady. Saraptama alynǵan zat «tuz» ataýymen belgili α-PvR sıntetıkalyq esirtkisi ekenin kórsetti. Tárkilengen zattyń jalpy salmaǵy - 1 kg 113 gr.
Budan bólek, polıtseıler ustalǵannyń 51 jastaǵy ákesiniń garajynan tirkelmegen qarýlardy tapty. Atap aıtqanda, qoldan jasalǵan ShTP avtomattarynyń mýlıajdary, IJ-K tegis uńǵyly ańshy myltyǵy, «IJ-38» pnevmatıkalyq vıntovkasy, «PERFECTA» gaz tapanshasy, ańshy jáne oıyqty qarýdyń patrondary, 2 myńnan astam qurylys-montaj patrondary jáne «F-1» oqý granatasy. Saraptama tárkilengen oq-dári men myltyq atýǵa jaramdy ekenin kórsetti.
Er adamnyń sózine qaraǵanda, ol qarýdy áýesqoı retinde jınaǵan. Qazirgi ýaqytta tergeý buryn isti bolmaǵan qala turǵynynyń qarý men oq-dárilerdi qaıdan alǵanyn anyqtaýda.
«Esirtkini ótkizý maqsatynda satyp alý, tasymaldaý jáne saqtaý faktisi QR Qylmystyq kodeksiniń 297-baby, qarýdy saqtaý faktisi – QR Qylmystyq kodeksiniń 287-baby 3-b. boıynsha Sotqa deıingi tergep-tekserýdiń biryńǵaı tizilimine engizildi. Esirtki qylmysyna qarsy is-qımyl basqarmasynyń qyzmetkerleri esirtkini jetkizý arnalarynyń jolyn kesý, satý faktilerin joıý boıynsha jumys júrgizedi. Jyl basynan 123 adam esirtkige qatysty qylmystyq jaýapkershilikke tartyldy, onyń 35-i esirtki satqany úshin. Zańsyz aınalymnan 415 kg astam psıhbelsendi zat alyndy», – dedi SQO Polıtsııa departamenti bastyǵynyń orynbasary Rýslan Nazarov.