SQO-da qyzy ákesin tonap, shotyndaǵy 800 myń teńgege jýyq aqshany qoldy etken
PETROPAVL. QazAqparat – Soltústik Qazaqstan oblysynda 19 jastaǵy boıjetken ınternet-bankıng arqyly ákesiniń 790 myń teńge aqshasyn urlady, dep habarlaıdy QazAqparat tilshisi.
SQO PD baspasóz qyzmetiniń málimetinshe, Petropavldaǵy ekinshi polıtsııa bólimine oblys ortalyǵynyń turǵyny júgingen.
Ol shotynan 790 myń teńgeniń joǵalǵanyn aıtqan.
Tergeý barysynda aqshany onyń kolledjde oqıtyn 19 jastaǵy qyzy urlaǵany anyqtaldy.
Al Petropavldyń ekinshi turǵynynyń shotynan 449 myń teńge qoldy bolǵan. Polıtseıler kúdiktini anyqtady.
Ol – buryn usaq urlyq jasaǵany úshin jaýapqa tartylǵan jábirlenýshiniń 20 jastaǵy ógeı uly bolyp shyqty.
Eki jaǵdaıda da urylar týystarynyń bank shoty qosylǵan uıaly telefonyn paıdalanǵan. Bul faktiler «Urlyq» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Sońǵy kezde osyndaı týystar arasynda jasalatyn urlyq kóbeıip barady. Kóbine zamanaýı tehnıkanyń tilin bilmeıtin egde tartqan adamdar zardap shegedi. Sondaı-aq, osyndaı qylmystar Wi-Fi fýnktsııasy bar, parolmen qorǵalmaǵan telefondaryn nemese bank kartalaryn joǵaltqan kezde jasalady. Adamdardy telefondaryna ózinen basqa eshkim bilmeıtin parol qoıyp, saq bolýǵa shaqyramyz. Bank kartalaryna rastaý kodysyz aqsha sheshýge lımıt qoıý qajet, bóten adam joǵalǵan kartamen lımıtten joǵary tólem jasaǵan kezde ıesiniń telefonyna habarlama kelip túsedi jáne ıesi operatsııadan bas tarta alady. Bank kartasy joǵalǵan jaǵdaıda qosymsha arqyly nemese bankke habarlasyp dereý buǵattap tastańyz» - deıdi Petropavldaǵy ekinshi polıtsııa bóliminiń bastyǵy Rýslan Syzdyqov.
SQO-da byltyr osy tektes 33 qylmys tirkeldi.
