SQO-da qyzmettik kólikti jeke basyna paıdalanǵan memqyzmetshiler jazalandy

PETROPAVL. QazAqparat - SQO etıka jónindegi keńestiń  kezekti otyrysynda memlekettik qyzmetshilerge qatysty birneshe tártiptik is qaraldy, dep habarlaıdy «QazAqparat» HAA tilshisi.

Soltústik Qazaqstan oblystyq orman sharýashylyǵy jáne janýarlar álemi ınspektsııasynyń basshysy Erejep Janataev demalys kúni qyzmettik kóligin paıdalanǵan. Erejep Janataev memlekettik qyzmet isteri jónindegi departamenttiń hatyna qyzmettik is boıynsha vokzalda bolyp, mınıstrlikten hat aldym dep jaýap bergen. Keıin anyqtalǵandaı, mınıstrlikten eshqandaı tapsyrma bolmaǵan.

«Erejep Janataev vokzalǵa óziniń jeke sharýalarymen barǵan. Memlekettik múlikti qoldaný boıynsha shekteýdi buzǵan. Bul degenimiz, Memlekettik qyzmet týraly zańnamany jáne Etıkalyq kodeks normalaryn buzǵan bolyp sanalady», - dedi SQO boıynsha Memlekettik qyzmet isteri jáne jemqorlyqqa qarsy is-qımyl agenttiginiń basshysy Ǵalym Tursynbaev.

Erejep Janataev óz kinásin moıyndady. Tártiptik keńes músheleri eskertý túrindegi tártiptik jaza qoldanýdy usyndy.

Aıyrtaý aýdandyq dene shynyqtyrý jáne sport bóliminiń basshysy Rústem Dáýletovke qatysty taǵy bir tártiptik is qaraldy. Ol qyzmettik ýaqyttan tys kezinde mas kúıinde  avtomobılmen júrgen. Tártiptik keńes músheleri aýdan ákimine Rústem Dáýletovke qatań sógis berýdi usyndy.