SQO-da qyzmettik ıtter 580 qylmystyń betin ashýǵa kómektesti
PETROPAVL. QazAqparat - Aıyrtaý aýdanynda Terem atty ıt 250 myń teńgege jýyq aqsha qoldy bolǵan qaraqshylyq oqıǵasynyń betin ashýǵa kómektesti, - dep habarlaıdy QazAqparat SQO ІІD-niń baspasóz qyzmetine silteme jasap.
Saýmalkól aýylynda jergilikti turǵyn jumystan kelgennen keıin úıinen altyn buıymdary men qural-saımandary joǵalǵanyn anyqtady. Jalpy shyǵyn 244 myń teńgeni qurady. Tártip saqshylary esikti buzý izderin baıqamady. Kýá bolǵandar da tabylmady. Osy kezde polıtseılerge Terem atty ıt kómektesken. Ol qaraqshynyń izin alyp, kórshi úılerdiń birine alyp kelgen.
«1983 jyly týǵan jergilikti turǵyn kórshisiniń úıine jıi baryp, sharýashylyqpen kómektesip turǵan. Ol urlyq jasaýǵa yńǵaıly ýaqytty anyqtap alǵan», - dep atap ótti baspasóz qyzmetinen.
«Urlyq» babymen sotqa deıingi tergep-tekserý amaldary júrgizilýde. Bul bap 5 jylǵa deıin bas bostandyǵynan aıyrýdy kózdeıdi.
Baspasóz qyzmetinen málim etkendeı, Terem bıyldyń ózinde 13 qylmystyq istiń betin ashýǵa kómektesti.
SQO ІІD kınologııalyq qyzmet ortalyǵynyń bastyǵy Samat Tólebaevtyń aıtýynsha, qyzmettik ıtter 635 ret shaqyrtýlarǵa shyqqan. Olardyń kómegimen 587 qylmys ashyldy, onyń 417-si - urlyq. Polıtseılerdiń tórt aıaqty kómekshileriniń ıis sezgishtik qabilettir zańsyz esirtki aınalymyna qatysty 26 qylmysty áshkereleýge sep bolǵan.
Soltústik Qazaqstan oblysynyń polıtsııa sapynda 21 ıt qyzmet atqarýda.
