SQO-da qyzmetkerlerine eki jyl jalaqy tólemegen JShS dırektory 6 jylǵa sottaldy

PETROPAVL. QazAqparat – Soltústik Qazaqstan oblysynda sot aktilerin oryndamady, eńbek zańnamasyn buzdy jáne asa iri kólemde alaıaqtyq jasady dep aıyptalǵan kásipker 6 jylǵa bas bostandyǵynan aıyryldy, dep habarlaıdy QazAqparat tilshisi.

SQO Aıyrtaý aýdandyq sotynyń málimetinshe, sottalýshy S. jaýapkershiligi shekteýli seriktestiginiń dırektory laýazymynda júrip, jarty jyl boıy 6,3 mln astam teńge zeınetaqy aýdarymyn aýdarý týraly sot buıryǵyn oryndamaǵan.

Sondaı-aq 2020 jyldyń jeltoqsanynan 2022 jyldyń naýryz aıyna deıin jumysshylardyń eńbekaqysyn tólemeı, ol aqshany basqa maqsatta jumsaǵan.

Budan basqa S. áleýmettik-kásipkerlik korporatsııasynyń kepildigimen 2020 jyldyń 5 myń tonna astyǵyna forvardtyq satyp alý jóninde kelisimge otyrǵan.

250 mln teńgeni qaıtaratyn oıy bolmaǵan, senimge kirip, úlken somany ıemdenip ketken.

Prokýror kásipkerdiń bar qylmysyn esepke alyp, oǵan 10 jylǵa jaza kesýdi surady.

Al sottalýshy S. óz kinásin moıyndamaı, sottan aqtaýdy surady.

Alaıda S-nyń kinási zardap shegýshilerdiń, kýágerlerdiń kórsetýimen, qylmystyq is materıaldarymen tolyq dáleldendi.

Sot úsh bap boıynsha aıyptalǵan sottalýshynyń kishkentaı balasynyń barlyǵyn qylmystyq isti jeńildetetin jaǵdaı dep tanydy.

Nátıjesinde Aıyrtaý aýdandyq soty S-ny 6 jylǵa bas bostandyǵynan aıyrdy. Ol jazasyn qylmystyq-atqarý júıesiniń ortasha qaýipsiz mekemesinde óteıdi.

Budan basqa S-ǵa 10 jylǵa basshy qyzmetke jáne qarjylyq, kommertsııalyq uıymdarda materıaldyq jaýapkershilik bar laýazymdarǵa ornalasýǵa tyıym salyndy.