SQO-da qyzmeti kezinde qaza tapqan qutqarýshylarǵa eskertkish qoıyldy
PETROPAVL. QazAqparat – Petropavlda azamattyq qorǵaý organdarynyń qyzmetkerlerine arnalǵan memorıal ashyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, memorıaldyń ashylý saltanatyna azamattyq qorǵaý organdarynyń ardagerleri, 2015 jylǵy 31 jeltoqsanda órt sóndirý kezinde qaza tapqan № 5 órt sóndirý bóliminiń bólimshe komandıri Altynbek Ábdirahmanovtyń týystary men jaqyndary jáne jeke quram qatysty.
«Elimiz Táýelsizdik alǵannan beri 50-den astam órt sóndirýshi men qutqarýshy otpen jáne tótenshe jaǵdaılarmen kúres barysynda mert boldy. Olardyń qatarynda bizdiń jerlesimiz Altynbek Ábdirahmanov ta bar. Altynbek sııaqty adamdardyń esimderi men taǵdyry azamattyq qorǵaý organdarynyń tarıhyna máńgi jazylmaq. Ár qyzmetker olardy maqtan tutady»,- dedi saltanatty rásimdi ashqan TJD bastyǵy Ramıl Kamalov.
Qaıǵyly oqıǵa 2015 jyly 31 jeltoqsan kúni boldy. Petropavldaǵy Benzostroı yqsham aýdanynda jekemenshik úı órtenip, órt sóndirýshiler jalynǵa oranǵan úıde bolǵan er adamdy qutqarady. Sol joly 27 jastaǵy Altynbek Ábdirahmanov qyzmettik mindetterin oryndaý kezinde qaza tapqan edi. Órt sóndirý bóliminiń komandıriniń ústine úıdiń tóbesi opyrylyp qulaǵan.
Memorıaldyń ashylý saltanatynda azamattyq qorǵaý organdarynyń ardagerler uıymynyń ókilderi, Altynbek Ábdirahmanovtyń týǵan-týystary men jaqyndary sóz sóıledi. «Men óz boryshyn aıaǵyna deıin oryndaǵan óz ulymdy maqtan etemin! Jáne de ár qutqarýshy úıine aman-saý oralýyna tilektespin», – dedi qaza tapqan órt sóndirýshiniń ákesi Oral Ábdirahmanov.
Shapaǵa jınalǵandar men Altynbektiń týǵan-týystary men otbasy músheleri bir mınýt únsizdikpen qaza bolǵandardy eske alyp, gúl shoqtaryn qoıdy.
