SQO-da Qytaıda jasalǵan qaýipti oıynshyqtar anyqtaldy
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, byltyr balalar oıynshyqtarynyń 212 synamasy zertteldi. Olardyń jartysyna jýyǵy - 99 oıynshyq synamasy tehnıkalyq reglamentterdiń talaptaryna sáıkes kelmegen, ıaǵnı 96-synyń tańbalaý boıynsha kórsetkishteri durys bolmaǵan. Al 9 oıynshyq úlgisi qaýipsizdik kórsetkishteri - toksıkologııalyq-gıgıenalyq jáne fızıkalyq-hımııalyq parametrler boıynsha bala densaýlyǵyna qaýipti bolyp shyqty. Oıynshyqtardyń barlyǵy Qytaıda jasalǵan eken.
«Qaýipti oıynshyqtardyń ishinde «Doctor play set», «Súıikti qýyrshaq», «pogremýshka», monshaqtar jıyntyǵy, janýarlar jıyntyǵy, Doll, Bearity oıynshyqtary bar. Olardan negizinen atsetaldegıd, fenol anyqtaldy. Bul zattar normadan birneshe ese artyq bolǵan. Bul ónimder Esil, Tımırıazev jáne Petropavldaǵy saýda oryndarynan satyp alyndy», - deıdi SQO sanıtarııalyq-epıdemıologııalyq baqylaý departamenti tehnıkalyq reglamentterdiń talaptaryn baqylaý bóliminiń basshysy Danııar Ospanov.
Al tańbalaý boıynsha 96 túrli oıynshyqta tıisti málimetter: daıyndaýshynyń ataýy men ornalasqan jeri, ımporttaýshy, onymen baılanysýǵa arnalǵan aqparat, daıyndalǵan kúni, EAEK belgisi, tańbalaý jáne oıynshyqpen jıyntyqta jetkiziletin, orys jáne memlekettik tilderde oryndalǵan tehnıkalyq qujattamalar bolmaǵan.
«Monıtorıng nátıjesi boıynsha talapqa saı kelmegen ónimdi ótkizýshilerge olardy joıý týraly uıǵarymdar berildi, qoldanystaǵy zańnamaǵa sáıkes sharalar qabyldaý úshin sanıtarııalyq-epıdemıologııalyq baqylaý komıtetine hattar jiberildi. Qaýipti ónimderdiń aýdandar men Petropavlda birli-jarymy ǵana satyldy, saýda nysandarynda oıynshyqtardyń qaldyǵy anyqtalǵan joq», - deıdi Danııar Ospanov.