SQO-da Qytaı men Reseıde shyǵarylǵan oıynshyqtardan qaýipti zattar tabyldy
PETROPAVL. QazAqparat - 2017 jyly qoǵamdyq densaýlyqty saqtaý departamenti balalarǵa arnalǵan 194 taýardy, sonyń ishinde 132 oıynshyqty tekserdi, dep habarlaıdy «QazAqparat» HAA tilshisi.
Balalar jáne bilim berý obektilerin sanıtarııalyq-gıgıenalyq qadaǵalaý bóliminiń basshysy Gúlnar Seıitovanyń aıtýynsha, 33 oıynshyq qaýipsizdik talaptaryna saı emes. Departament mamandary úsh synamadan formaldegıd jáne fenol kontsentratsııasynyń aıtarlyqtaı joǵary ekenin anyqtaǵan.
«Qytaıda shyǵarylǵan «Karapýz» qýyrshaǵynda 0,4 mg/l formaldegıd tabyldy. Reseıdiń «Aelıta» zaýytynda óndirilgen «Vesennıaıa progýlka» syılyǵynan tabylǵan formaldegıd kontsentratsııasy 0,13 mg/l-ge jetti. Bul zat oıynshyqtarda 0,1 mg/l bolǵanda ǵana ruqsat etiledi. Al oıynshyq quramynda 0,05 mg/l bolǵanda ruqsat etiletin fenol mólsheri Reseıdiń «Zavod ogonek» kásiporny shyǵarǵan «Lıagýshka s lıagýshatamı» oıynshyǵynda 0,09 mg/l ekeni anyqtaldy», - deıdi Gúlnar Seıitova.
Oıynshyqtardy qostanaılyq kompanııa jetkizgen. Kompanııanyń óz qoımasy joq ekeni anyqtaldy, olar taýardy saıt arqyly satyp alyp, satyp otyrǵan.
Oıynshyqtardyń basqa synamalarynda markalaý qaǵıdalary buzylǵan. Mamandardyń aıtýynsha, mundaı jaǵdaıda da qaýip joq emes. G. Seıitova bergen málimetterge súıensek, talapqa saı emes oıynshyqtar óndirý boıynsha Qytaı (57,6%) aldyna jan salar emes. Oǵan ilese Reseı (27,3%), Ýkraına (9%) jáne Belarýs (6,1%) óndirýshileri keledi.
Jalpy sońǵy eki jylda ondaı oıynshyqtardyń mólsheri SQO-da aıtarlyqtaı qysqardy.
