SQO-da qystyń alǵashqy eki aıy qarly-borandy bolady - Qazgıdromet
«Qazgıdromet» RMK boljamy boıynsha jeltoqsan-qańtar aılary borandy bolyp, qar qalyń túsedi. SQO Tótenshe jaǵdaılar departamentiniń bólim basshysy Serik Naýryzbaevtyń aıtýynsha, óńirde birqatar keshendi shara qolǵa alyndy. Búginde 300 jylytý pýnkti daıyn tur. Joldardy ashýǵa qajet 1250 tehnıka saqadaı saı.
«Sońǵy eki jylda qysta orta eseppen 30 ret joldar jabylyp, jeńil kólikterdiń júrýine shekteý qoıyldy. Ótken qysta TJD, jergilikti bılik jáne jol uıymdarynyń kúshimen jolda qalǵan adamdar 31 ret qutqaryldy. Kómek berilgen 86 adamnyń 8-i – bala.
Byltyr qar az boldy. Biraq soǵan qaramastan 23 ret jol jabylyp, kóliktiń júrýi shekteldi. Bıyl qazan aıynan bastap respýblıkalyq mańyzdaǵy joldar eki ret jabyldy», - deıdi Serik Naýryzbaev.
Mamannyń aıtýynsha, SQO aýmaǵynda 406 qar basatyn aýmaq esepke alyndy. Jalpy óńirde 9 myń shaqyrymǵa jýyq jol bar.
Bıyl qys bastalmaı jatyp qutqarýshylar birqatar apattyq-qutqarý jumysyn júrgizgen. Sonyń biri 5 qarasha kúni Taıynsha aýdanyndaǵy Kellerovka eldi mekeninde boldy. Aýa raıynyń buzylýyna oraı respýblıkalyq mańyzdaǵy jol jabylyp, avtobýspen kele jatqan 43 adam, sonyń ishinde 7 bala jylytý pýnktine ornalastyryldy. Olardyń barlyǵy Reseı azamattary. Jolaýshylar túnep, tańerteń aman-esen saparlaryn jalǵastyrdy.
«Óńir turǵyndary men qonaqtaryn daýyldy eskertýlerge qulaq asyp, kún raıy buzylǵan jaǵdaıda, boranda jolǵa shyqpaýǵa keńes beremin. Alys jolǵa shyqqan jaǵdaıda kóliktiń tehnıkalyq jaǵdaıyn teksertip alǵan jón. Ózińizben birge kúrek, maı sham, jyly kıim alyp shyǵýdy umytpańyz. Dızelmen júretin kólik bolǵan jaǵdaıda maýsymdyq otyndy paıdalaný qajet. Óıtkeni buǵan deıin jazǵy dızel otynyn quıyp, jolda turyp qalǵan kólikter boldy», - deıdi SQO TJD bóliminiń bastyǵy Serik Naýryzbaev.