SQO-da qyrkúıek aıynan beri 300-ge jýyq oqýshy koronavırýs juqtyrǵan
PETROPAVL. QazAqparat – Soltústik Qazaqstan oblysynda jańa oqý jyly bastalǵaly 281 oqýshy qaýipti vırýsty juqtyrdy, dep habarlaıdy QazAqparat tilshisi.
SQO-nyń bas sanıtarııalyq dárigeri Arman Kúshbasov koronavırýs boıynsha óńirdegi ahýalǵa baılanysty ótken brıfıngte ótken aptany qorytyndylady. Mamannyń aıtýynsha, 14-20 jeltoqsan aralyǵynda oblysta KVI juqtyrýdyń 457 jaǵdaıy tirkelgen. Bul onyń aldyndaǵy aptamen salystyrǵanda 7,6% tómen.
«KVI derti óńirde tirkelgeli onymen jas sanatyndaǵylar aýyrǵan. Ásirese 60 jastan asqandardyń úlesi joǵary, olarǵa barlyq aýyrǵandardyń 27%-i tıesili. Juqtyrǵanardyń 19% - 50-59 jas aralyǵyndaǵylar bolsa, 17%-i – 30 ben 39 jas aralyǵyndaǵylar. Sondaı-aq vırýs jumys isteıtinderdiń arasynda jıi taralady, ol - 32% qurasa, ekinshi orynda 23% zeınetkerler tur», - deıdi Arman Kúshbasov.
Qyrkúıek aıynan 281 oqýshyda COVID-19 anyqtalǵan. Olardyń 143-i bilimdi qashyqtan alyp, vırýsty týǵan-týystarynan juqtyrǵan. Qazirgi ýaqytta taǵy 6 mektep balalardyń aýrýyna baılanysty qashyqtan oqýǵa kóshirildi.
«KVI shekara asyp keletinderde de jıi tirkeledi. 6 qazan men 19 jeltoqsan aralyǵynda Reseıden avtomobıl joldaryndaǵy shekara beketteri arqyly 39 myń adam ótti. 2134 adamda PTR test qorytyndysy bolmaǵan, solardyń 208-inde COVID-19 anyqtaldy. 21-i ınfektsııalyq statsıonarǵa jatqyzylsa, 187 ambýlatorlyq em alýǵa jiberildi», - deıdi oblystyń bas sanıtarııalyq dárigeri.
Arman Kúshbasov sondaı-aq oblys ortalyǵynyń 25 jeltoqsannan bastap jabylmaıtynyn málim etti. Sońǵy kezde áleýmettik jelilerde osy jaıynda alyp-qashpa áńgimeler kóbeıip ketken edi.
«Karantın talaptaryn kúsheıtip, oblys ortalyǵyn jabý bizdiń josparymyzda joq. Óıtkeni oǵan negiz joq, SQO búginde «sary aımaqqa» engen. Áleýmettik jelilerde 25 jeltoqsannan Petropavl qalasy jabylady degen jazba tarady. Bul bos sóz», - dedi SQO-nyń bas sanıtarııalyq dárigeri Arman Kúshbasov.
