SQO-da qylmystyq toptyń 206 tomnan turatyn isi sotqa joldandy
PETROPAVL. QazAqparat - Soltústik Qazaqstan oblysynda jeti jyl boıy jalǵan shot-faktýralarmen aınalysyp, memleketke mıllıardtap shyǵyn keltirgen uıymdasqan qylmystyq toptyń isi sotqa jetti, dep habarlaıdy QazAqparat tilshisi.
Uıymdasqan qylmystyq top salyqtan jaltarǵan kásipkerlerge jalǵan shot-faktýralar berip kelgen. Saldarynan memleketke 2 mlrd teńgeden astam shyǵyn kelgen.
«Uıymdasqan qylmystyq top byltyr maýsym aıynda jedel-izdestirý is-sharalary barysynda ustaldy. Olardyń zańsyz qyzmetine 300-den astam bıznes ókili júgingen. Sotqa deıingi tergeý barysynda kelisimderdiń jalǵandyǵy anyqtaldy. Sondaı-aq sot 14 kásiporynnyń tirkelgen jáne qaıta tirkelgen qujattaryn zańsyz dep tapty», - deıdi SQO boıynsha Ekonomıkalyq tergeý departamentiniń bastyǵy Nurymjan Abatov.
Mamandardyń aıtýynsha, qazirgi ýaqytta shamamen 25 mln teńge bıýdjetke qaıtaryldy. Tergeý aıaqtalyp, 11 epızod, 206 tomnan turatyn qylmystyq is sotqa joldandy.
